MTIBWA SUGAR YAAMUA KUMBAKIZA JUMA LUIZIO

Uongozi wa timu ya Mtibwa Sugar ya mkoani Morogoro, umemzuia mshambuliaji wao, Juma Luizio kwenda kucheza soka la kulipwa katika klabu ya Zesco ya nchini Msumbiji baada ya kupeleka jina lake TFF kwa ajili ya kumtumia msimu ujao wa Ligi Kuu Bara.

SALEHJEMBE iliona jina la Luizio ambaye alifuzu kuichezea Zesco hivi karibuni na kusaini mkataba wa miaka mitatu, likiwa sehemu ya majina ya usajili yaliyowasilishwa na kikosi hicho cha Manungu kuwa ni mmoja kati ya nyota watakaoitumikia timu hiyo msimu ujao.

Mkratibu wa Mtibwa Sugar, Jamal Bayser, alisema uhamisho wa mchezaji huyo bado haujakamilika ndiyo maana wamepeleka jina lake TFF kwa madai kuwa bado ni mchezaji wao halali na watamtumia msimu ujao unaotarajiwa kuanza kutimua vumbi Septemba 20 mwaka huu.

“Luizio bado ni mchezaji wetu halali kwa sababu usajili wake wa kwenda Zesco haujakamilika

ndiyo maana tumepeleka jina lake TFF ili kumtumia kwenye ligi kuu.

“Timu ya Zesco United walipocheza na timu ya Simba ilikuwa ni mechi ya kirafiki ndiyo maana na yeye alicheza mchezo ule siyo mechi ya ligi,” alisema Bayser.  

Hivi karibuni mchezaji huyo aliliambia gazeti hili kuwa amemalizana kila kitu na Zesco ambapo alidai kuwa amesaini mkataba wa miaka mitatu.