PHIRI AMTAKA TAMBWE ATULIE, NAFASI YA KUCHEZA KWAKE IPO

Baada ya kumuacha katika kikosi cha timu hiyo kilichocheza dhidi ya URA ya Uganda hivi karibuni, Kocha Mkuu wa Simba, Patrick Phiri, amemtuliza mshambuliaji wake raia wa Burundi, Amissi Tambwe na kumhakikishia kuwa atapata nafasi ya kucheza.

Ijumaa iliyopita, Tambwe alijikuta katika wakati mgumu baada kutoswa katika kikosi cha timu hiyo ambacho kilicheza na URA na kulazimishwa kutangulia kwa basi mkoani Mtwara akiwa na wachezaji wengi wa timu B kwa ajili ya mechi ya juzi Jumamosi ya kirafiki dhidi ya Ndanda FC kwenye Uwanja wa Nangwanda Sijaona.

Hali hiyo imemsikitisha Tambwe na kuanza kuyaona maisha yake klabuni hapo kuwa machungu kama shubiri huku furaha yote aliyokuwanayo msimu uliopita ikitoweka.

Mmoja wa viongozi wa Simba ambaye aliomba kutotajwa jina lake, alisema kuwa baada ya Tambwe kuonyesha kutofurahia hali hiyo, kocha Phiri alimwita na kuzungumza naye na kuhakikishia kuwa atapata nafasi ya kucheza katika kikosi chake cha kwanza, hivyo anatakiwa kutulia.

“Hali hiyo pia ilitusikitisha baadhi ya viongozi lakini hatukuwa na jinsi lakini pia, baada juzi kocha Phiri kufika Mtwara, alimwita Tambwe na kuzungumza naye.

“Alimtaka asiwe na hofu na aendelee kufurahia maisha katika kikosi hicho kama ilivyokuwa zamani na atapata nafasi ya kucheza kwa sababu ni mmoja wa wachezaji anaowategemea kwa ajili ya kuiongoza Simba kufanya vizuri msimu ujao,” alisema mtoa habari huyo.

Tambwe kwa sasa hana uhakika wa namba katika kikosi cha kwanza cha Simba kutokana na washambuliaji, Emmanuel Okwi na Paul Kiongera kuonekana kuwa chaguo la kwanza la Phiri.