PRISONS WAONYA MAPEMA KUHUSIANA NA JAJA

Kocha Mkuu Prisons, David Mwamwaja ameonyesha hofu kuhusiana na mshambuliaji wa Yanga, Jaja raia wa Brazil kwamba asipewe upendeleo maalum  kwa maana ya kulindwa bila sababu.

MWAMWAJA AKIWA NA KIKOSI CHA PRISONS

Mwamwaja ambaye ni mmoja wa makocha wazoefu amesema kikosi chake kiko imara na tayari kwa ajili ya mechi dhidi ya Yanga Jumapili jijini Dar, lakini asingependa kuona kuna upendeleo fulani kwa wachezaji, mfano akieleza kuhusu Jaja.

“Kwa kweli sisi tumejiandaa, umeona mechi yetu ya kirafiki dhidi ya Ashanti pia imetusaidia, kuna mambo ya kujifunza na kurekebisha.

“Lakini vizuri uchezeshaji uwe mzuri na haki, kusiwe na upendeleo wa wachezaji fulani kuonekana kama wao ni tofauti.

“Silengi kuwalaumu waamuzi, ila natoa tahadhari mapema kwamba sisi hatuna hofu na Jaja wala mchezaji mwingine wa Yanga, tumejiandaa kucheza vizuri na kutafuta ushindi,” alisema Mwamwaja akionyesha kujiamini.

Prisons  ilishinda mchezo wake wa kwanza wa Ligi Kuu bara kwa kuichapa JKT Ruvu kwa mabao 2-0, wakat Yanga ilipoteza kwa idadi hiyo dhidi ya Mtibwa Sugar.