ALICHOFANYA MAXIMO KWA TEGETE KILIKUWA SAHIHI, ANASTAHILI KUENDELEA

YANGA imepata ushindi wake mnono wa kwanza katika Ligi Kuu Bara ikiwa chini ya Mbrazili, Marcio Maximo, baada ya kuichapa Stand United kwa mabao 3-0.

Mechi hiyo iliyopigwa juzi, Yanga imefanikiwa kuitwanga Stand kwa idadi hiyo ya mabao kwenye Uwanja wake wa nyumbani wa Kambarage mjini Shinyanga.

Kabla ya kukutana na Stand United, Yanga ilikuwa imecheza mechi nne, ikiwa imeshinda mbili, sare moja na kupotea moja. Unaweza kusema ilikuwa imepitia matokeo yote matatu ya soka.

Hata hivyo, safu yake ya ushambuliaji haikuwa imefanikiwa kufunga mabao manne katika mechi zake nne zilizopita, hivyo kuifanya kuwa na mabao manne ya kufunga katika mechi nne.

Wastani wa mabao manne katika mechi nne si sahihi kwa timu unayoweza kuipa kipimo cha fowadi kali na bora inayoweza kuitwa ni hatari.

Inawezekana Maximo alikuwa katika hatua za mwanzo kuanza kuiimarisha safu yake ambayo ni mpya kwake, lakini kuna sehemu alikuwa anakosea na majibu ameanza kuyapata.

Ushindi huo mkubwa wa mabao 3-0 dhidi ya Stand United umekuwa wa kwanza, lakini idadi ya mabao imeongezwa na mchezaji aliyekaa benchi mechi zote nne za mwanzo. Huyo ni Jerry Tegete.

Huwezi kumlaumu Maximo kwa Tegete, kwa kuwa ndiye alikuwa wa kwanza kumuamini na kumtumia hadi kwenye kikosi cha timu ya taifa, Taifa Stars wakati huo alipokuwa kocha kabla ya kurejea kwao Brazil.

Lakini safari hii, alionekana kutomuamini katika mechi zote nne za mwanzo hadi alipofanya hivyo juzi na Tegete akamuonyesha mwalimu wake huyo kuwa alimsahau kwa kufunga mabao mawili.

Huenda Maximo alikuwa na hofu iwapo atamuweka Jaja nje anaweza kuonekana alileta mtu ambaye si sahihi au aliona kumpa muda mwingi wa kucheza kunaweza kumsaidia kuizoea ligi ya Tanzania Bara, yote hayo yanawezekana.

Lakini sasa tayari amepata jibu kwamba Tegete na Hussein Javu, kwa mpira wa Kibongo, wanastahili nafasi ya kucheza hata kama itakuwa hivyohivyo ya kugawana.

Tegete na Javu waliingia kipindi cha pili wakati Yanga inaongoza kwa bao 1-0 lililofungwa na Mbrazil Jaja. Javu akatoa pasi ya bao la pili kwa Tegete ambaye baadaye alifunga la pili kwake na la tatu kwa Yanga.

Tegete aliingia dakika ya 70, dakika ya 77 akafunga bao akiwa amecheza dakika 7 tu. Hii inaonyesha mchezaji huyo ana uwezo mkubwa wa kutupia mipira kwenye nyavu, vema akapewa nafasi.

Mimi siwezi kusema Jaja hafai kwa kuwa anaonekana ana sifa zote za umaliziaji hata kama alikuwa anaandamwa na ukame wa mabao. Lakini inawezekana pia Tegete akawa msaada kwa Jaja kama ataona kuna mshindani anayeweza kuifanya vizuri kazi yake yeye akizubaa.

Hivyo Maximo anaweza kumtumia Tegete kumsaidia Jaja kama sehemu ya changamoto, pia Tegete ni msaada kwa kuwa ana uwezo wa kufunga mabao mawili katika nafasi nne au tano anazozipata.

Soka ni mchezo ambao unajumuisha makosa, maana yake kila mmoja anaweza kukosea lakini jaribio la Maximo kwa Tegete limefanya kazi. Javu naye ameonyesha anaweza kutoa mchango.

Hivyo hakuna haja tena kwa Maximo kuhofia au kutaka kurudi nyuma huenda kwa kuhofia lawama kwamba Jaja hafai au vinginevyo, badala yake aangalie maslahi ya Yanga kwamba inastahili ushindi.

Jaja atakayepewa changamoto ya Tegete aliye katika kiwango, anaweza kuwa bora zaidi kuliko akiwa na uhakika wa namba kwa asilimia mia, kila siku.

Kitu kizuri zaidi kwa Tegete, kama Maximo atazitoa nafasi hizo kwake, ana kila sababu ya kuonyesha kwamba kocha huyo alikuwa sahihi naye ajitume badala ya kujisahau kama atarejea na kuanza kuonyesha cheche.