MWENDO WA COUTINHO, MSUVA WAMPA HOFU OKWI

Kiungo mshambuliaji wa Simba, Mganda, Emmanuel Okwi, hivi sasa ni mwenye mawazo mengi kila anapofikiria kasi ya wachezaji wawili  wa Yanga, Andrey Coutinho na Simon Msuva kabla ya timu hizo mbili kuonyeshana ubabe Septemba 18, mwaka huu.

Okwi amekumbwa na hali hiyo kutokana na kukosa imani na safu ya ulinzi ya timu yake ambayo imeonyesha kutokuwa imara katika mechi zake za Ligi Kuu Bara.

 Okwi amesema bado hawajawa katika kiwango chao bora hali inayopelekea kuwa na mawazo mengi.

Alisema kama safu hiyo inashindwa kukabiliana na wachezaji ambao kasi yao ni ya kawaida, vipi itakapokutana na wachezaji wenye kasi kubwa kama ilivyo kwa wale ya Yanga?

“Tunatakiwa kubadilika sasa na kucheza soka la uhakika, vinginevyo mambo yatakuwa magumu sana kwetu na tutashindwa kufikia malengo tuliyojiwekea msimu huu.

“Tunakabiliwa na mechi ngumu zaidi mbele yetu na ambazo zina upinzani mkubwa, hivyo kama tukiendelea kuwa katika kiwango hiki na kufanya makosa ya ajabu mara kwa mara, itakuwa vigumu kwetu kufanya vizuri katika mechi hiyo.

“Ni matumaini yangu kuwa kocha atakuwa ameyaona makosa yote yaliyojitokeza, hivyo atayafanyia kazi haraka iwezekanavyo kabla ya kukutana na Yanga ambayo ina wachezaji wengi wenye kasi kubwa kama vile Msuva, Ngassa na Coutinho,” alisema  Okwi ambaye katika mechi ya juzi dhidi ya Stand United, alionekana akiwafokea mabeki wa timu hiyo baada ya kufanya makosa yaliyowapatia wapinzani wao hao bao la kusawazisha.

Okwi amejiunga na Simba hivi karibuni akitokea Yanga ambayo alikuwa akiitumikia msimu uliopita, hata hivyo usajili wake huo ulizua utata mkubwa kabla ya TFF kuamua acheze Simba.