Bosi Mkuu wa
kikosi cha vijana cha Simba chini ya miaka 20, Nico Kiondo, amesema kuwa hawezi
kumtumia kiungo mpya, James Msuva katika kikosi chake kwenye mechi za
maandalizi kuelekea Kombe la Uhai mpaka pale watakapokamilisha usajili wake.
Msuva ni mdogo wa
kiungo wa Yanga, Simon Msuva ambaye Simba imeonyesha nia ya kumnasa katika
kipindi hiki cha dirisha dogo la usajili lililofunguliwa tangu Novemba 15,
mwaka huu.
Licha ya
kuendelea kufanya mazoezi na timu hiyo, Msuva hakuweza kucheza mchezo wa
kirafiki dhidi ya Tabata Academy uliochezwa katikati ya wiki hii kwenye Uwanja
wa Kinesi, Shekilango jijini Dar kutokana na kusumbuliwa na ugonjwa wa Malaria.
Msuva Jr alikuwa jukwaani pamoja na wachezaji wengine ambao
hawakuwa kwenye mipango ya kucheza mchezo huo na alipoulizwa alisema kuwa
anasumbuliwa na Malaria.
Mara baada ya mechi hiyo, Kiondo alisema kuwa Msuva ni miongoni mwa wachezaji wazuri wanaojitahidi lakini
hataweza kumtumia kwenye mashindano ya Uhai kutokana na usajili wake
kutokamilika.
“Unajua nina
wachezaji wengi wazuri katika kikosi cha vijana ambao wote wanajituma akiwemo
Msuva lakini siwezi kumtumia katika michezo ya kirafiki kwa sababu bado
viongozi wanaendelea na mazungumzo ya kumsajili, sasa ni vigumu kuendelea kumpa
nafasi katika mechi za kirafiki kutokana na kuwa timu inajiandaa na mashindano
ambayo yataanza wiki ijayo,” alisema Kiondo.
0 COMMENTS:
Post a Comment