Kiungo wa Simba, Haruni Chanongo amegoma
kujiunga na kikosi cha pili cha timu hiyo.
Chanongo alipata sekeseke la kusimamishwa hivi
karibuni baada ya kushutumiwa anacheza chini ya kiwango lakini baadaye likatoka
tamko kuwa anahitaji kurejea kucheza kikosi B cha timu hiyo kwa ajili ya
kuimarisha kiwango, kitu ambacho Chanongo hakukifanya.
Aidha, tangu kutolewa kwa agizo hilo, nyota
huyo hajaonekana kwenye mazoezi ambayo yanaendelea kwenye Uwanja wa Mwenge
Shooting, Dar huku kocha mkuu wa kikosi hicho, Nicholas Kiondo akisema kuwa
hajamuona na wala hajui yuko wapi.
Kutokana na hilo tayari uongozi wa Simba
unafanya mpango wa kukaa chini na mchezaji huyo kwa mara nyingine na kuangalia
tatizo ni nini mpaka anashindwa kutii kile anachoelekezwa kufanya.
Kiondo amesema Chanongo hajaonekana katika
mazoezi ya kikosi chake na kusema kuwa hawezi kulitolea ufafanuzi zaidi suala
hilo kwani hana taarifa zake rasmi.
“Mhh…! Nimekuwa nikisikia taarifa zake kuwa
anatakiwa kuwa na sisi, lakini sijamuona na wala hajawahi kufika mazoezini
kwangu. Siwezi kulizungumzia zaidi maana sijapewa taarifa rasmi kuhusu yeye,”
alisema Kiondo.
Alipoulizwa Msemaji wa Simba, Humphrey Nyasio,
alisema: “Chanongo anatakiwa kuwa na kikosi cha vijana na tayari tulishampa
taarifa kuhusu kwenda huko lakini kweli mpaka sasa hajajumuika na kikosi kama
alivyoelekezwa na anaonekana kama hataki, kwa hiyo uongozi sasa utazungumza
naye juu ya hilo na kujua kwa nini amekataa kutii agizo hilo.
“Lakini pia kwa kukataa agizo hilo, Chanongo
anakuwa kama anajichelewesha mwenyewe kurejea kurudi kikosi cha wakubwa kwa
kuwa alishaambiwa atafanya kule kwa siku chache kisha mwalimu Phiri (Patrick)
atamrejesha mara moja.”
0 COMMENTS:
Post a Comment