PLUIJM AMUONDOA NGASSA KATIKA KIKOSI KITAKACHOIVAA POLISI LEO

Kocha Mkuu wa Yanga, Mholanzi, Hans van Der Pluijm, amemuondoa kiungo wake mshambuliaji, Mrisho Ngassa kwenye kikosi kitakachoivaa Polisi Morogoro leo.

Yanga inatarajia kuvaana na Polisi Morogoro katika mechi ya raundi tisa ya Ligi Kuu Bara itakayopigwa kwenye Uwanja wa Jamhuri, Morogoro.

Pluijm alisema kuwa amemuondoa kiungo huyo kikosini kutokana na kutofanya mazoezi ya pamoja na timu hiyo kwa siku mbili mfululizo katika kujiandaa.

Pluijm alisema sera yake ni kwamba mchezaji asipofanya mazoezi ya pamoja na timu kwa siku mbili, ni vigumu kumtumia katika mechi inayofuata, hivyo Ngassa hatakuwepo uwanjani kuwavaa Polisi Moro.

Aliongeza kuwa, kiungo huyo hakufanya mazoezi ya pamoja na timu hiyo kutokana na matatizo ya kifamilia aliyoyapata na kusababisha kusafiri kwenda Tanga kuyamaliza.

“Mimi sera yangu ni kuwa mchezaji asiyefanya mazoezi kwa siku mbili mfululizo, basi atakuwa amejiandoa kwenye kikosi changu, kwa sababu hauwezi kumtumia mchezaji ambaye hayupo fiti.

“Ninaamini wapo wachezaji wengine nitakaowatumia wenye uwezo mkubwa, Ngassa huenda akawepo kwenye mechi ijayo baada ya kukamilisha matatizo hayo ya kifamilia,” alisema Pluijm.