STORI YA KUVUTIA YA FAMILIA YA BIN SLUM NA AFRICAN SPORTS HII HAPA…

AFRICAN SPORTS...

Na Saleh Ally

AFRICAN Sports imefikisha jumla ya pointi 38 baada ya kucheza mechi 18 na ndiyo inayoongoza kundi lake, unaweza kusema inanukia kurejea Ligi Kuu Tanzania Bara.

Kuna makundi mawili na kila moja litapandisha timu mbili. African Sports imebakiza mechi nne na kama itashinda mbili kati ya hizo, basi ina uhakika.

Wakati African Sports inapambana kurejea Ligi Kuu Bara, usisahau kuwa imekuwa chini ya udhamini wa kampuni ya Bin Slum Tyres Ltd ya jijini Dar es Salaam ambayo mmiliki wake ni mnazi mkubwa wa Coastal Union ya Tanga.

Coastal Union na African Sports ni washindani wakubwa katika mji wa Tanga na usisahau historia inawabeba kama ndugu wa Yanga na Simba.

Coastal ni ndugu wa Simba na African Sports maarufu kama Wana Kimanumanu ni ndugu wa Yanga.

Bin Slum ni familia yenye wanazi wa Coastal Union ambao ni washindani wakubwa wa African Sports lakini ndiyo kampuni inayopambana kuhakikisha timu hiyo inapanda.

MOHAMMED BIN SLUM (KULIA) WAKATI WA KUSAINI MKATABA NA MBEYA CITY.

Taarifa zinaeleza kwamba uongozi wa kampuni hiyo ya matairi umekuwa ukipambana vilivyo kwa kushirikiana kwa karibu na uongozi wa African Sports ‘Wana Kimanumanu’ ili kuhakikisha timu hiyo inarejea Ligi Kuu Bara!

Maswali ni kama hivyo, vipi Bin Slum anaisaidia African Sports wakati yeye ni Coastal Union tena wa kutupwa?

Kweli mdau wa Simba anaweza kuisaidia Yanga kufanya vizuri? Mkurugenzi Mkuu wa kampuni hiyo ya kuuza matairi, Nassor Bin Slum anafafanua.

“Kwanza nikubali kwamba hatujawa na mkataba wa kikazi na African Sports. Lakini timu hiyo inadhaminiwa na kampuni hii kupitia mdogo wangu ambaye pia ni shabiki wake.

“Mohammed bin Slum ni mmoja wa wanachama wa African Sports kabisa. Kama mimi ambavyo niliwahi kupambana kuisaidia Coastal Union, naye anafanya hivyo kwa African Sports.

“Wengi wamekuwa wakichanganya wanaposikia Bin Slum wanadhani ni mimi. Lakini kampuni ndiyo hiyohiyo,” anasema bin Slum.

NASSOR BIN SLUM (KULIA) WAKATI WA KUINGIA MKATABA NA NDANDA FC.

“Ingawa mimi ninaamini tofauti na watu wengi. Kwamba kama African Sports itapanda daraja basi itakuwa ni manufaa makubwa kwa Coastal Union.

“Mimi ni mnazi wa Coastal hata kama siidhamini. African Sports ikiwa changamoto, najua na watu wa timu yangu wataongeza juhudi kuhakikisha wanafanya vizuri kwa kuwa ushindani wa wapinzani wao utakuwa karibu.”

Juhudi za kumpata Mohammed, zilifanikiwa. Yeye ambaye ni mmoja wa vijana wanaopenda michezo anasisitiza kwamba African Sports itakuwa changamoto kwa soka la mkoa wa Tanga.

“Mimi natokea Tanga, kampuni yetu iko Dar es Salaam lakini bado inaweza kusaidia maendeleo ya soka katika mkoa wa Tanga pia.

“Utaona tuliwahi kuidhamini Coastal, sasa tunaidhamini Stand United, Mbeya City na Ndanda FC. Hivyo kurudi nyumbani na kuisaidia timu ya nyumbani si jambo baya.

“Naweza kusema katika suala la African Sports, Bin Slum imekuwa ikijitolea kwa hali na mali ili kurudisha ushindani katika soka mkoani Tanga,” ansema Bin Slum mdogo.

Kampuni hiyo maarufu ya kuuza matairi nchini ndiyo inayoongoza kwa kudhamini timu nyingi zaidi katika Ligi Kuu Bara.

Bin Slum Tyres Ltd inadhamini timu tatu za Mbeya City, Stand United na Ndanda FC na pia imeweka rekodi ya kuwa kampuni ya kwanza kudhamini timu zilizopanda daraja ndani ya miaka miwili.

Iliiamini Mbeya City ikiwa ni msimu mmoja tu baada ya kupanda daraja lakini ikafanya hivyo kwa Stand United na Ndanda FC zikiwa ndiyo zimepanda daraja msimu huohuo.