HANS POPPE AWEKA MSISITIZO, ATAKA NA AMISSI TAMBWE NATE AADHIBIWE

GAZETI LA CHAMPIONI LA LEO IJUMAA...

Ile picha iliyochapishwa kwenye gazeti la Championi Jumatatu iliyopita imezidi kuzua gumzo.

Picha hiyo ilimuonyesha mshambuliaji wa Yanga, Amissi Tambwe akipigwa kabali na beki wa Ruvu Shooting, George Michael.

Wadau wengi wamekuwa wakipinga jambo hilo lakini leo Mwenyekiti wa Kamati ya Usajili ya Simba, Zacharia Hans Poppe ameibuka na kuongeza kupinga ukatili huo wa beki wa Ruvu, lakini akaibua jipya..huku akisema hata yeye inaonekana alifanya makosa makubwa na alistahili kadi nyekundu.

“Kama umeona ile picha iliyochapishwa kwenye gazeti la Championi leo Ijumaa, inaonyesha wazi kabisa kuwa Tambwe anampiga kibao yule beki wa Ruvu.

"Kweli ile ya mwanzo kwenye gazeti la Championi la Jumatatu ilionyesha Tambwe akikabwa na halikuwa jambo zuri, si kwamba naliunga mkono.

"Lakini picha ya leo, inaonyesha hata Tambwe anastahili adhabu na siku ile alitakiwa apewe kadi nyekundu," alisema Hans Poppe.

Picha ya kwanza iliyozua gumzo ni ile iliyochapishwa kwenye Championi Jumatatu Tambwe akiwa amekabwa lakini Championi Ijumaa likachapicha picha nyingine ikionyesha Tambwe akijibu mashambulizi kwa beki huyo wa Ruvu.

Tayari mwamuzi wa mchezo huo wa Yanga dhidi ya Ruvu Shooting uliomalizika kwa sare ya bila bao Jumamosi iliyopita, Mohamed Theopili amesimamishwa akisubiri uchunguzi na siku yake ya kujitetea ambayo imeelezwa itakuwa ni Februari 6.

Kumekuwa na gumzo kubwa kuhusiana na picha hiyo ya kwanza, lakini Hans Poppe naye ameamsha gumzo hilo akisisitiza haki itendeke baada ya picha hiyo ya pili kuchapishwa kwenye Championi.