COASTAL UNION WAWEKA HADHARANI KILICHOSABABISHA KOCHA WAO MKENYA KUACHIA NGAZI

NANDWA AKIWA NA WACHEZAJI WAKE WA COASTAL UNION SIKU CHACHE KABLA YA KUTANGAZA KUJIUZULU.

Uongozi wa timu ya Coastal Union ya Tanga, umefunguka na kutaja sababu zilizopelekea kocha wao, James Nandwa, kukabidhi barua ya kuacha kazi juzi Jumatatu jioni kwa kile walichosema kuwa hakutimiza malengo yake.

Tayari, Coastal wamemkabidhi kikosi Jamhuri Kihwelo ‘Julio’ ambaye atasaidiana na Joseph Lazaro ambaye alikuwa kocha wa African Sports iliyopanda ligi kuu msimu huu.

Msemaji wa Coastal, Oscar Assenga, amesema kuwa katika barua hiyo, Nandwa ambaye ni raia wa Kenya, alibainisha kuwa aliamua kujiweka pembeni kutokana na timu kuendelea kufanya vibaya, tofauti na malengo yake aliyojiwekea wakati anakuja.

“Katika barua yake, yeye alisema kuwa hakuridhishwa na kiwango cha timu na hakujua sababu za kuendelea kufanya vibaya. Ameshinda mechi moja katika mechi saba, jambo ambalo yeye amesema kuwa si kiwango chake kiufundishaji,” alisema Assenga.

Coastal mpaka sasa ndiyo imebadilisha makocha mara mbili ndani ya msimu huu, ambapo ilianza ligi ikiwa na Mkenya, Yusuf Chippo ambaye alitimkia FC Leopard ya nchini kwao.