COUTINHO AOMBA YANGA WASIACHE NIYONZIMA AONDOKE

Kiungo mshambuliaji wa Yanga, Mbrazili, Andrey Coutinho, amesema hatamani kuona kiungo wa timu hiyo, Mnyarwanda, Haruna Niyonzima, anaihama timu.

Niyonzima anatarajia kumaliza mkataba wake mwishoni mwa msimu huu na kuna taarifa kuwa amesharuhusiwa kuondoka.

Kauli hiyo, ameitoa Mbrazili huyo hivi karibuni ikiwa ni siku chache tangu Niyonzima atangaze kuondoka mara baada ya mkataba wake kumalizika mwishoni mwa msimu huu wa ligi.

Coutinho alisema hakuna mchezaji anayemvutia akiwa ndani ya uwanja kama Niyonzima kutokana na uwezo wake mkubwa wa kuichezesha timu.

Coutinho alisema, kiungo huyo ana uwezo wa kucheza soka nchi yoyote ikiwemo Brazil kutokana na kiwango chake huku akimtaka kuongeza mkataba mwingine wa kuendelea kuichezea Yanga.

 “Niyonzima ni kiungo bora Yanga na hata kwenye ligi kuu, nimesema hivyo baada ya kuwaona viungo wengi kwenye mechi mbalimbali nilizozicheza na kuziona katika ligi kuu.

“Ninakuhakikishia kuwa, Niyonzima ana uwezo wa kucheza soka nchi yoyote ikiwemo Brazil, kwa maana ya kiwango cha soka, anacho kikubwa, ni mchezaji ninayependa kucheza naye, hakika sitamani kumuona anaondoka,” alisema Coutinho.