HONGERA MDIMU, SIMBA, YANGA KWA VITA YA MAUAJI ALBINO

 Simba na Yanga ndiyo timu zenye mashabiki wengi zaidi katika Ukanda wa Afrika Mashariki na Kati.

Mechi hiyo kutokana na ukubwa wake imekuwa ikivuta watu wengi sana kuihudhuria na kuifuatilia kupiria vyombo mbalimbali vya habari.

Wachezaji wa Yanga na Simba walifanya moja ya jambo jema na la kihistoria kuhusiana na vita dhidi ya mauaji ya ndugu zetu albino.

 

Suala hilo lilisimamiwa na mwandishi wa habari Henry Mdimu ambaye pia ni albino na Yanga na Simba wakakubali wazo lake.

Simba na Yanga walivaa fulana wakionyesha kuguswa na wakipinga suala hilo, kwamba si sahihi pia ni unyama wa kupindukia.

Jambo jema, jambo la maana na wanapaswa kupongezwa kwa kuionyesha jamii wanapinga upuuzi na imani potofu kama hizo.

Kupinga kuwa eti viungo vya albino vina bahati na watu wanaweza kupata utajiri.

 

Ujinga wa kiasi hicho umekithiri, Tanzania inaaibika mbele ya dunia kuwa ina watu wanaoamini ushirikina hadi kushindwa hata kudhamini uhai wa binadamu wenzao.

Hilo ni jambo jema kwa kuwa mashabiki wa Yanga au Simba wanaweza kubadili imani zao kwamba kinachofanyika ni upuuzi mkubwa.

SALEHJEMBE inaamini moja ya mambo muhimu yanayoihusu jamii ambayo Simba na Yanga wamewahi kuyafanya ni kupinga mauji ya albino, hadharani.

Hongereni Yanga na Simba kwa mlichokifanya, baada ya hilo, bado mna nafasi ya kuisaidia jamii ya Watanzania kwa kuwa nayo inawaunga mkono.