KOCHA SIMBA, SASA AGEUKIA UBINGWA, ASEMA SIMBA INAWEZA

Kocha Mkuu wa Simba, Goran Kopunovic, ameibuka na kutamba kuwa sasa kikosi chake kimeingia kwenye vita ya kuwania ubingwa wa ligi kuu msimu huu.

Tambo hizo zimekuja kufuatia kasi ya kugawa dozi, ambapo timu hiyo imeshinda michezo mitatu mfululizo; dhidi ya Prisons, Yanga kabla ya juzi Jumamosi kuinyuka Mtibwa Sugar bao 1-0.

Simba ilianza msimu kwa kusuasua ikiwa chini ya Mzambia, Patrick Phiri lakini kwa sasa ndiyo timu tishio ikiwa chini ya Mserbia, Kopunovic.

Kopunovic amesema awali alianza kwa kukijenga upya kikosi chake, lakini kwa sasa wameingia rasmi kwenye kinyang’anyiro cha ubingwa, unaowaniwa pia na vinara Yanga na Azam ambao wanautetea.

“Tuko  kwenye vita ya kuwania ubingwa, naamini kwa idadi ya pointi tulizonazo pamoja na wale walio juu yetu, nina imani tunaweza kuuwania. Awali tulikuwa tunajenga kikosi kutokana na kukikuta hakina morali lakini sasa tunaangalia jinsi ya kutwaa taji,” alisema Mserbia huyo, kabla ya Makamu Mwenyekiti wa Kamati ya Usajili, Idd Kajuna kufunguka zaidi.

“Huu ndiyo mwanzo wa kuwania ubingwa, tulikuwa kwenye kipindi cha mpito, tulianza vibaya ligi lakini sisi kama viongozi tumehimiza mshikamano kuhakikisha timu inarejesha imani ya kutwaa ubingwa. Naamini tunaweza kufanya hivyo sasa,” alisema Kajuna.

Ushindi wa juzi uliifanya Simba kufikisha pointi 29, mbili nyuma ya vinara Yanga ambao wana mechi mbili mkononi.