TFF WAONYWA KUACHANA NA KUIINGILIA BODI YA LIGI

Shirikisho la Soka Tanzania (TFF), limeombwa kuacha mara moja kuingilia kazi za Bodi ya Ligi na kuzitaka pande zote mbili kufanya kazi kiweledi.

Rai hiyo lilitolewa jana na wajumbe 250 kwenye Mkutano Mkuu wa TFF uliofanyika katika Hoteli ya Morogoro, mkoani Morogoro kwa siku mbili.

Hivi karibuni kumekuwepo na mkanganyiko wa TFF kutajwa kuingilia kazi za Bodi ya Ligi, ikiwemo kupanga ratiba.

Wakizungumza kwenye kilele cha mkutano huo, wajumbe walisema mambo yameonekana kutoenda sawa kwenye Bodi ya Ligi na hiyo imetokana na muingiliano wa kikazi na TFF.

“Tunawaomba TFF na Bodi ya Ligi, muwe na mipaka katika utendaji wenu, TFF muache kuingilia kazi na maamuzi ya Bodi ya Ligi. Ndiyo maana kumekuwepo na changamoto nyingi sana,” alisema mmoja wa wajumbe wa mkutano huo.

Kwa upande wa TFF, wamesema watalifanyia kazi suala hilo na kuahidi kuendelea kufanya kazi kwa ushirikiano na bodi na siyo kuingilia kazi zao.