WANAODHARAULIWA KAMA HAWA, NDIYO WATAKAOZIMALIZA SIMBA, YANGA KESHO

Na Saleh Ally

HAKUNA anayejua nani atafunga kwa upande wa Yanga au Simba katika mechi ya Ligi Kuu Bara kwenye Uwanja wa Taifa jijini Dar es Salaam, kesho Jumapili.

Lakini ni rahisi kusema Mrisho Ngassa, Simon Msuva kwa Yanga au Emmanuel Okwi na Ibrahim Ajibu ‘Kadabra’ watafunga kwa Simba.

Wako unaoweza kuona hawana lolote, lakini haupaswi kuwadharau kwa kuwa wakati mwingine mechi za watani, wafungaji ni wale usiowatarajia.

Nadir Haroub ‘Cannavaro’ ni hatari kwa Simba sababu ya vichwa, hali kadhalika awe Joseph Owino au Juuko Murshid, Waganda hao pia ni wazuri hewani, Yanga wachunge.

Hata hivyo, bado hauwezi kuwadharau wachezaji wafuatao kwamba wanaweza kucheka na nyavu kesho;

Yanga:

Tambwe:

Huenda akataka kumaliza kiu yake kesho, lakini unajua Amissi Tambwe ni mjanja na huenda ndiye mtu ambaye Simba wanapaswa kumuangalia sana ndani ya 18. Wako walioamini kweli ameisha, wameanza kuona tofauti.

Kichwa chake ni silaha zaidi ya bunduki. Anajua kukitumia hata akiwa kwenye kasi na shingo yake kama feni, inakata kona na kumaliza kazi. Wamchunge.

Tegete:

Jerry Tegete hajafikisha miaka 30, ameishafunga Simba mabao matano. Ana mechi saba haijaifunga Simba. Lakini akipewa nafasi, Simba wasidhani amesahau kufunga, ng'ombe hazeeki maini, atawazuru kwa kuwa ufungaji wake ni kipaji.

Javu:

Huyu jamaa ni mzuri, Simba wanamkumbuka akiwa Mtibwa Sugar. Uwezo wake wa kufunga uko juu sana na Kocha wa Yanga, Hans van der Pluijm akimpa nafasi, basi Simba lazima wajue hatari iko mbele yao kwa kuwa anapiga mashuti, si muoga na ana uwezo mkubwa wa kulenga.

Mrwanda:

Hata iweje, uzoefu utambeba. Anajua wakati gani afunge au abadili njia. Tayari ana bao moja dhidi ya Simba msimu huu wakati akiwa Polisi Moro, walioliona lile bao watakumbuka alitumia ustadi mkubwa kuuwahi mpira na kufunga. Kwa pasi za kiungo Haruna Niyonzima, Simba wanapaswa kuwa makini na ubora wa umaliziaji wa Daniel Mwarwanda ‘Mrwanda’.

Sherman:

Tayari anaonekana hafai, hajafunga tokea aanze kuchezea Yanga. Lakini iwapo atakutana na mipira ya chini karibu na lango la Simba, ubora wake ni mzuri katika umaliziaji.

Amekuwa msumbufu asiyefunga, lakini atakuwa anajifunza kila kukicha kuhusu soka ya Tanzania. Hivyo lazima ataonyesha mabadiliko na anajua, Yanga wanataka afunge na siku nzuri ni kesho.

Simba:

Awadh:

Unamjua, unaweza kusema ana bahati na mechi za watani, pia ana juhudi. Awadh Juma amefunga mechi zote za Mtani Jembe, maana yake anaweza kufanya hivyo kesho kwa kuwa atakuwa na kiu ya kufunga na hata uoga hana.

Awadhi si mchezaji mwenye mbwembwe, huenda usimuone hadi katika tukio husika. Mjanja, ana nguvu halafu ni ‘mapafu ya mbwa’ na anapopaka nafasi, asilimia 80 anaitumia.

Sserunkuma:

Danny Sserunkuma ni mjanja, mzoefu na mwepesi wa maamuzi. Mechi ya kesho anaweza kutoa pasi ya bao au kufunga mwenyewe na hiyo ndiyo sababu kuu kwamba ni vigumu kukabika, haujui atafanya nini mwisho.

Anapoingia katika eneo la 18, anakuwa mtulivu kuliko kobe na hiyo ndiyo presha kubwa kwa mabeki. Ndugu yake Simon Sserunkuma kama atacheza au kuingia, pia ni hatari kwa kuwa mwepesi wa maamuzi na ana uwezo wa kupiga mashuti na pasi za mabao.

Maguri:

Elius Maguri si mchezaji mwenye uwezo mkubwa wa soka la kuvutia, lakini ni ‘mnyama’ ambaye anataka kutikisa nyavu hata mara tano katika mchezo mmoja. Ana nguvu, hachoki na kiwango chake cha juhudi kiko juu.

Akianza, Kelvin Yondani na Nadir Haroub ‘Cannavaro’ lazima wawe makini kwa kuwa katika Nani Mtani Jembe aliwafunga bao lililowaacha wakiwa wamezubaa, alipiga mpira, ukagonga mwamba, kabla hawajafika akauwahi na kufunga. Maana yake katika umaliziaji, ni mwepesi zaidi.

Ndemla:

Kinda ambaye alionyesha uwezo mkubwa katika michuano ya vijana Ujerumani. Said Ndemla aliingia katika mechi dhidi ya Yanga Oktoba 20, 2013 na kuisaidia Simba kusawazisha mabao yote matatu baada ya kwenda mapumziko ikiwa haina kitu.

Mwepesi, anajua wapi pasi yake iende kabla mpira haujamfikia, lakini ana uwezo wa kukatisha na mpira katikati ya uwanja akiwapita mabeki. Usisahau ni mzuri kwa mashuti.

Singano:

Moja angalia krosi zake, mbili usumbufu wake kwa mabeki. Lakini katika ufungaji, anaweza kuwa katika tano bora ya ufungaji. Inapofikia anatakiwa kuutupia mpira wavuni, hutulia kama dereva wa kijiko aliyekiendesha kwa miaka 30, hana hofu.

Beki Mbuyu Twite ni bora kwa ukabaji, Singano aliwahi kumkalisha chini. Maana yake ana uwezo wa kumpita beki yeyote kesho. Pia ni mzuri wa pasi za mwisho.