BIN SLUM: COASTAL UNION, HUU NI WAKATI WA KUPATA VIONGOZI SAHIHI

Mmoja wa wanachama maarufu wa Coastal Union, Nassor Bin Slum amesema ni wakati mwafaka kwa wanachama wa klabu hiyo kurudi pamoja na kuungana.

Bin Slum ameshauri wanachama wasahau tofauti zao, waungane kwa lengo la kuisaidia klabu hiyo na timu yake lakini ukifika wakati wa uchaguzi wa viongozi wajue kuwa uchaguzi huo ni muhimu sana kwa maisha ya klabu yao.

“Ukifika wakati huo wa uchaguzi, basi wachague viongozi sahihi ambao wataiongoza Coastal Union katika njia sahihi.

“Wawe viongozi ambao wataiondoa Coastal katika makundi na wawe wanaotaka kuifanya Coastal ni moja,” alisema Bin Slum na kuongeza.

“Kwa sasa tunaungana kwa kuhakikisha timu inabaki katika ligi kuu. Baada ya ligi, unafuatia uchaguzi na lazima mashabiki wawe makini sana.

“Tukubaliane kuwa kuna sehemu tulikosea, Coastal Union ilikuwa na makundi na ndiyo yaliyochangia matatizo makubwa yaliyojitokeza.”

Bin Slum aliwahi kuwa Mkurugenzi wa Ufundi wa Coastal Union, pia mdhamini wa klabu hiyo.

Lakini ilitokea hali ya kutoelewana na uongozi wa klabu hiyo hadi walipomuomba kurejea asaidie baada ya mambo kuwazidi nguvu na hawakuwa na ujanja tena.

Ingawa wengi walitarajia kumuona Bin Slum akikataa kurejea, yeye aliwashangaza wengi kurudi kuisaidia Coastal Union akisisitiza ni klabu anayoipenda tokea utoto na yuko tayari kusaidiana na wengine kuisaidia.