DISCO LA SIMBA, ETOILE; MUZIKI ULEULE, DJ ANABADILI RANGI YA CD TU

OKWI WAKATI AKIICHEZEA ETOILE DU SAHEL

Na Saleh Ally

INAWEZEKANA wengi wamekuwa wakijaribu kupotosha hoja ya msingi ya kile ambacho nimekuwa nikikizungumzia kuhusiana na biashara ya mchezaji Emmanuel Okwi iliyofanyika kati ya Simba na Etoile du Sahel.

Huenda kuna kila sababu ya kushikilia na kusisitiza kile ambacho nimekuwa nikikielezea kwamba Okwi aliuzwa ‘bure’ na Simba ilifanya biashara ‘kichaa’. Ilimuuza kwa dola 300,000 (Sh milioni 480), hadi sasa haijawahi kulipwa hata senti!

Wiki iliyopita nilionyeshwa mwandishi mmoja alizungumza na Rais wa Etoile du Sahel, Charefeddine Ridha na swali lake la msingi lilikuwa ni kumuuliza kama kweli walifanya dili yeye na Mwenyekiti wa Simba wakati huo, Ismail Aden Rage, yaani huenda alipewa chochote.

Jibu la rais huyo wa Etoile lilikuwa “hapana”, huku akisisitiza wao hufanya mambo yao kwa unyoofu. Nikashangazwa na “akili” ya mwandishi, kweli alitegemea jibu la “kweli tulimlipa fulani dili”. Ingekuwa kichekesho!

Tena mbaya zaidi, eti rais huyo akasema Rage anachafuliwa tu! Utajiuliza anajua nini kuhusiana na hilo, eti anachafuliwa! Kweli watu wenye akili zao timamu wanaweza kusifia katika hilo!

Nikaachana na hilo, sikutaka kuwa kwenye kundi la kuwaridhisha watu kwa kuwa najua gazeti ninalolitumikia ni gazeti la wasomaji, si kwa ajili ya kuridhisha watu hata kama wamefanya madudu. Pia naepuka kuwa kwenye kundi la wanaoandika kwa mtindo wa “gari la mkaa”. Leo shamba, kesho gereji.

Msisitizo unabaki palepale, mambo ya kuchafuliwa yawekwe kando na anayepinga kwamba Simba hawakufanya biashara ya kichaa anyooshe mkono, atoe hoja za msingi. Hakuna ubishi Rage alifanya makosa.

Alifanya biashara mali kauli, akakubali kutoa uhamisho wa Okwi, Simba ikiwa haijalipwa hata senti. Hili ndiyo nimekuwa nikisisitiza, suala la alipewa au hakupewa cha pembeni mimi silijui, linabaki kuwa siri yake. Ila maswali yanaongezeka kutokana na alivyoshiriki katika suala hilo na lilivyokwenda, majibu anayo mwenyewe.

Ndiyo maana suala hili naliona kama vile ni Simba na Etoile wanacheza disco. Dj anapiga muziki uleule, lakini anatudanganya kwa kutubadilishia rangi ya CD tu! Wenyewe tuko ‘busy’ tunashindana kucheza.

Fedha wanazotakiwa kulipwa Simba ziko wapi hadi sasa? Hata kama Shirikisho la Soka la Kimataifa (Fifa) limesema baada ya kesi hiyo ya Simba, vipi hadi leo hawajalipwa.

Nataka nikukumbushe msomaji, hata Simba wakilipwa mwezi ujao, hawatakwepa kauli ya kuwa walifanya biashara kichaa ambayo si mkopo lakini unakabidhi unachokiuza halafu unakuja kulipwa baada ya miaka mitatu baadaye.

Watu makini hawawezi kufanya biashara ya “kupapasa” kama hiyo. Kila kitu kina misingi yake na Simba isingesumbuka leo kwenda Fifa au kwingineko na badala yake kama kuna tatizo kati ya Okwi dhidi ya Etoile wangelimaliza wenyewe na si Simba kujumlishwa.

Makamu wa Rais wa Shirikisho la Soka Tunisia (FTF), Krifa Jalel aliniambia kwanza alitaka kumuona Okwi ili amhoji kwa nini aliondoka Tunisia baada ya miezi mitano na ushee.

Akasisitiza, Simba vipi wanataka kulipwa wakati Okwi yuko Dar es Salaam na anaichezea Simba tena wanajua ameondoka Tunisia bila ya kufuata utaratibu?

Hili lilinipa picha huenda Simba watalipwa miaka kumi ijayo, ikiwezekana wameishapita zaidi ya marais wawili madarakani baada ya Evans Aveva.

Tathmini ya hili linaonekana kuingiliwa na siasa, lakini ukweli unaonyesha hivi, Simba ya Rage ilichemka katika hili, awe alikuwa akijua au la.

Mbaya zaidi, alikuwa mkali kila linapozungumziwa suala hili kwa kisingizio kuwa anasakamwa. Sasa hadi leo wamelipwa? Jibu unalo.

Sasa kutumwa au kusakamwa kunaingia vipi? Jiulize tena, Etoile walikuwa hapa jijini hakuna kiongozi wa Simba aliyewafuata hata kuwauliza.

Kweli suala liko Fifa, lakini bado kukutana na viongozi hao tena rais wa klabu, ingekuwa nafasi nzuri ya kukaa na kuzungumza nao kujua ukweli angalau kuwashawishi kiungwana na ikiwezekana kujenga urafiki wa mambo mengine.

Nakumbuka Simba walifunga safari hadi Tunisia kwenda kuzungumza nao. Wakiwa hapa, hakuna aliyewaona kusisitizia hilo. Sijui, tusubiri, lakini msisitizo wangu kwa mara nyingine ni huu. “Simba wamefanya biashara kichaa kwa kumuuza Okwi bure.”

SOURCE: CHAMPIONI