HII KALI, TFF YAWEKA PINGAMIZI RUFAA YA DK NDUMBARO ISISIKILIZWE

DK NDUMBARO AKIWA MAKAO MAKUU YA FIFA KATIKA JIJI LA ZURICH NCHINI USWISS.

Shirikisho la Soka Tanzania (TFF) limeamua kuweka wazi msimamo wake wa kuhakikisha Dk Damas Daniel Ndumbaro haokoki katika kifungo cha miaka 7 alichofungiwa kujishughulisha na masuala ya soka.

Awali, TFF ilikuwa ikituhumiwa kumfungia Dk Ndumbaro kwa woga kwamba ni tishio kwa uongozi wa TFF.

Juzi ikatuhumiwa kufanya njama ashindwe kutokea katika kikao wakati rufaa yake ikisikilizwa na Katibu Mkuu, Mwesigwa Celestine akazungumzia hilo huku akisema kuwa taarifa ya yeye kwenda kwenye kikao ilipaswa kutolewa na Mwenyekiti wa Kamati ya Rufaa, jambo ambalo pia lilipingwa na Dk Ndumbaro.

Lakini leo, TFF rasmi imeweka pingamizi kupinga kusikilizwa kwa rufaa ya Dk Ndumbaro. Taarifa kutoka ndani ya kamati hiyo ya rufaa zimeeleza TFF inapinga kusikilizwa kwa rufaa ya mwanasheria huyo maarufu, kitu kinachoashiria inataka adhabu yake iendelee.

Tayari Dk Ndumbaro alishailipa TFF kitita cha Sh milioni moja ili rufaa yake isikilizwe.

Sasa TFF iliyomfungia, TFF iliyopokea fedha zake ili rufaa isikilizwe ndiyo inayopinga tena rufaa isisikilizwe.

Juhudi za kumpata Dk Ndumbaro alizungumzie suala hilo zinaendelea na juhudi za kuwapata TFF nao zinaendelea.