KASEJA, BOBAN, SALEH ALLY KUONYESHA YAO VIKAWE KESHO

Kiungo mshambuliaji, Haruna Moshi ‘Boban’ na kipa, Juma Kaseja ni kati ya wachezaji watakaoiongoza timu ya Dar City kesho Jumapili kucheza mechi ya kirafiki dhidi ya Kombaini ya Vikawe iliyopo Pwani.

Kwa mujibu wa mratibu wa mechi hiyo, Athuman Tippo ‘Zizzou’, mchezo umeandaliwa maalum kwa ajili ya kuhamasisha michezo mkoani Pwani.

SALEH ALLY (KULIA) AKIPAMBANA KATIKA MOJA YA MECHI....

Tippo alisema kikosi cha Dar City kitajumuisha pia baadhi ya Waandishi wa Habari za Michezo akiwemo Saleh Ally na Wilbert Molandi wa magazeti ya Championi na watangazaji Shaffih Dauda na Mbwiga Mbwiguke wa Clouds Media Group.

Alisema mechi hiyo inatarajiwa kuchezwa Jumapili saa 10:00 kwenye Uwanja wa Shule ya Msingi Vikawe uliopo Kibaha.

“Kikubwa tunataka kuhamasisha michezo huko Vikawe na katika kutimiza hilo, tumepanga kucheza mchezo mmoja wa kirafiki na wakazi wa huko kwa kuwatumia wachezaji, waandishi na watangazaji maarufu nchini,” alisema Tippo.