KOMBE LA SHIRIKISHO, YANGA NDIYO IMEINGIA KUGUMU ZAIDI

Na Saleh Ally

USHINDI wa jumla wa mabao 5-2 dhidi ya FC Platnum ya Zimbabwe umeipeleka Yanga katika raundi ya pili ya Kombe la Shirikisho.

Mfumo wa michuano hiyo ya pili kwa ukubwa upande wa klabu barani Afrika ni hivi; kila mnavyozidi kupanda, ndiyo ugumu unavyozidi kuongezeka.

Hadi jana jioni, Yanga ilikuwa ikisubiri mshindi kati ya Benfica ya Angola dhidi ya Etoile du Sahel ya Tunisia.

Lakini utaona ndoto ya Yanga kuingia hatua 16 bora ya michuano hiyo ilivyo na ugumu na lazima kuwe na mipango sahihi wakati wa maandalizi kwa kuwa si rahisi.

Yanga inahitaji dakika 360 za uhakika wa mambo ili kuingia katika hatua ya 16 bora ambayo itaanza kuchezwa kwa mfumo wa ligi.

Dakika 360 ni mechi nne ambazo Yanga itatakiwa kucheza, mbili wakati wa raundi ya pili na kama ikifuzu mbili tena katika hatua ya mtoano ya mwisho.

 Iko hivi, sasa Yanga itacheza raundi ya pili, itakuwa kazini dhidi ya Etoile du Sahel ya Tunisia. Zitakuwa mechi mbili ambazo ni dakika 180. Baada ya hapo, inaingia katika play off round ambayo italazimika kucheza dakika kama hizo na ukizijumlisha unapata 360.

Inajipanga vipi? Hilo ndiyo suala muhimu kwa Yanga hata kama wakiamua kuchagua raundi kwa raundi kabla ya kusonga.

Mfano, hesabu ziwe za raundi ya pili ambazo ni dakika 180, wakimaliza waingie katika raundi nyingine yenye dakika 180.

Ugumu unaonekana wazi kuwa sasa timu zilizo katika raundi mbili zilizobaki zitakuwa zinatokea katika nchi kama Algeria, Afrika Kusini, Mali, Tunisia, Gabon, Ivory Coast, Ghana na  DR Congo.

Hii ni sehemu tosha ya kuonyesha Yanga imefanya vema hadi sasa lakini ndiyo inaingia katika mzigo mkubwa zaidi na inalazimika kujua imeingia hatua ambazo zinahitaji umakini zaidi.

Hakuna hata timu moja ya Afrika Mashariki iliyopita baada ya. Dedebit ya Ethiopia kutolewa jana na Warri ya Nigeria, halafu Rayon ya Rwanda ikiwa nyumbani ikakumbana na kipigo kibaya cha mabao 3-0 ikiwa nyumbani dhidi ya Zamalek ya Misri ambayo katika mechi ya kwanza ilishinda pia kwa mabao 3-1 ikiwa nyumbani jijini Cairo.

Kuhofia si sahihi, kuchukua tahadhari ndiyo sahihi na kuamini kuwa inaingia katika hatua ngumu zaidi ni jambo la msingi.

Pamoja na kuandaa mambo mengine. Yanga inatakiwa kujiimarisha kwa mipango ya ugenini. Uimara wa Yanga katika mechi za ugenini umeonekana uko chini.

Mechi ya kwanza dhidi BDF XI ya Botswana ilisonga mbele kwa jumla ya mabao 4-3. Nyumbani ilishinda 2-0, ilipokwenda ugenini ikafungwa 2-1 tena baada ya kutangulia kwa bao la Mrisho Ngassa.

Mechi ya pili dhidi ya FC Platnum, Yanga ilianza vizuri nyumbani kwa mara nyingine kwa ushindi wa mabao 5-1. Iliposafiri hadi Zimbabwe ikafungwa kwa bao 1-0 na kufuzu kwa jumla ya mabao 5-2.

Hesabu za Yanga inapokuwa nyumbani ziko bomba sana. Lakini inaonekana haina ‘matairi’ ya kusafiri safari ndefu, jambo ambalo si sahihi.

Ikiwa itakosea katika mechi ya nyumbani. Mfano mechi ijayo ikianzia nyumbani ikapata sare au kupoteza, basi tayari itakuwa imetoka.

Ukiangalia uchezaji wa ugenini, Yanga imekuwa ikicheza kwa kujiamini na inawezekana hata kushinda. Lakini ule ugonjwa umekuwa ukiwakabili hata katika Ligi Kuu Bara, kupoteza nafasi nyingi umekuwa tatizo lisilo na ufumbuzi.

Yanga wanapata nafasi nyingi za kufunga lakini zimekuwa na msaada mdogo kwao kwa kuwa wanafunga hadi 30% ya nafasi wanazozipata ambalo si jambo sahihi.

Ugumu unazidi kupanda, Yanga wanalazimika kubadili mambo zaidi kwa kuwa sasa wanapanda na wanazidi kuingia katika kundi lenye timu makini zaidi na zenye hamu kubwa ya kupata mafanikio.

Miezi mitatu kuanzia Aprili, Mei na Juni tayari Yanga itakuwa ina jibu sahihi imefikia wapi. Kwani Aprili na Mei itakuwa imemaliza mechi mbili za raundi ya pili, itajua kama imefuzu.

Ikifanikiwa, itakuwa inaingia raundi ya mwisho ya mtoano kabla ya kuingia katika makundi na mechi zake mbili zitachezwa  kati ya Mei 17 na 19 halafu kurudiana ni Juni 5 na 7.

Miezi hiyo mitatu kwa Yanga inapaswa kuwa ni ya maisha tofauti katika mambo mengi. Ianzie kwa wachezaji kutambua majukumu yanayowakabili lakini iende kwa makocha na viongozi kwani maandalizi ya timu yanapaswa kuwa tofauti wakijua ugumu na umuhimu mechi hizo.

Mfano ule usajili wa kishabiki kwa kuwa Simba wamemchukua nani, ufe. Wachezaji wajilinde, pia wajue umuhimu wa kazi iliyo mbele yao kwa kuwa sasa Yanga inapambana kwa ajili ya maslahi ya klabu yao, lakini kwa taifa zima la Tanzania.