MABAO MAWILI LIGI KUU, SHERMAN AANZA MAJIGAMBO

Licha ya mshambuliaji wa Yanga, Mliberia, Kpah Sherman, kufunga mabao mawili tu kwenye ligi, ameanza kupata jeuri na kusema kuwa kwa sasa amebadilika na hataki mchezo uwanjani, atakuwa na kazi moja tu ya kuhakikisha anafunga mabao katika kila mechi.

Sherman ambaye alitua Yanga katikati ya msimu huu, akitokea timu ya Centikaya ya nchini Cyprus, alitajwa kuwa mfumania nyavu hatari, lakini haikuwa hivyo kwenye mechi zote alizocheza kwenye Ligi Kuu Tanzania Bara.

Lakini kwenye mechi mbili zilizopita ameibuka ghafla na kufunga bao kwenye ushindi wa mabao 8-0, walioupata dhidi ya Coastal Union na kisha kwenye ushindi wa 3-1 mbele ya Mbeya City.

                                                                                                                                    

Sherman alisema, alikuwa akiteseka sana pale alipoona hafungi mabao, lakini kwa sasa ameshapata dawa, ndiyo maana kwenye mechi mbili zilizopita ameweza kufunga bao katika kila mechi na hataishia hapo.

Alisema alikuwa akisumbuliwa na aina ya uchezaji wa Yanga, lakini dawa inayomfanya abadilike ni kuwa sasa ameshajua namna ya kujiweka kwenye nafasi nzuri ya kufunga mabao kirahisi.

“Sasa ni muda wangu wa kufunga, nimejiuliza sana kwa nini nilikuwa sifungi, lakini nimeshapata jibu, ndiyo maana unaona nafunga, sitaishia hapa nasema huu ndiyo mwanzo, nitazidi kuifungia Yanga katika kila mechi nitakayocheza” alisema Sherman.