HATIMAYE COUTINHO AREJEA KAZINI YANGA, TELELA BADO 'GONJWA'

Kiungo tegemeo wa Yanga, Salum Telela, bado haijabainika kama atarejea hivi karibuni uwanjani kutokana na majeraha aliyonayo, lakini habari njema kwa Wanayanga ni kwamba kiungo wao, Andrey Coutinho amerejea uwanjani.

Telela aliumia kifundo cha mguu na kushindwa kumalizia mechi wikiendi iliyopita walipokuwa wanaumana na Mbeya City kwenye Uwanja wa Taifa ambapo Yanga ilishinda 3-1.

Daktari wa Yanga, Juma Sufiani, amefafanua kuwa, tayari ameshamfanyia matibabu Telela ingawa bado ana maumivu ambayo bado hayajatoa picha halisi kama ataweza kurejea hivi karibuni au la.

“Telela tumemfanyia vipimo, kifundo cha mguu ndiyo kinamsumbua lakini ni mapema mno kusema sasa atakaa nje baada ya muda gani kulingana na maumivu aliyonayo,” alisema Sufiani.

Kwa upande wa Coutinho amesema:“Kwa sasa nipo fiti kabisa kuweza kurejea uwanjani na kuendelea kucheza kama ilivyokuwa hapo awali na nimejipanga vya kutosha kuhakikisha napambania namba yangu katika kikosi cha kwanza.

“Najua itakuwa siyo rahisi kutokana na viwango ambavyo vinaonyeshwa na wachezaji waliopo kama Msuva na Ngassa lakini nitampambana mpaka mwisho.”