TFF YAITWANGA SIMBA BARUA IKISISITIZA LAZIMA IONANE NA TAMBWE, YENYEWE YASEMA INAMSUBIRI ATOKE ZIMBABWE

Shirikisho la Soka Tanzania (TFF), limeilima barua Klabu ya Simba likitaka kuhakikisha inakutana na nyota wa Yanga, Amissi Tambwe kwa ajili ya kumaliza tofauti zao.

Hatua hiyo imekuja kutokana na Tambwe kuishtaki Simba kutokana na kutolipwa madai yake ya kiasi cha dola 11,000 (zaidi ya Sh milioni 20), kama fidia ya kukatishwa mkataba wake, kabla hajasaini Yanga siku hiyohiyo baada ya kuachwa.

Katibu wa Simba, Stephene Ally, alikiri kupokea barua hiyo na kusema walikuwa wanamsubiria Tambwe arejee kutoka Zimbabwe alikokwenda na klabu yake kwenye michuano ya Kombe la Shirikisho kumenyana na FC Platinum.

 “Ni kweli tumepokea barua kutoka TFF kutuambia tukae chini na Tambwe ili tuelewane kuhusu madai yake. Tumelikubali hilo ila kwa sasa tunasubiri arudi kutoka Zimbabwe ili tuweze kuzungumza naye,” alisema Ally.

Simba imekuwa na rekodi mbaya ya kuvurugana na wachezaji wake kimaslahi, huku hivi sasa ikiwa na mvutano na nyota wake, Hassan Kessy.

Tayari TFF limetoa tahadhari kwa timu aina ya Simba, kwamba zinaweza kujikuta zikifungiwa usajili kutokana na kuwepo kwa kesi za madai ya malipo.