MKUDE APATA PIGO, BABA YAKE AFARIKI DUNIA, YEYE AONDOKA KAMBINI SHINYANGA

Kiungo mkabaji wa Simba, Jonas Mkude, amepata pigo baada ya kufiwa na baba yake mzazi, Gerald Jonas Mkude kutokana na kusumbuliwa na matatizo ya figo, hivyo kiungo huyo ameondoka Shinyanga jana Jumapili kurejea Dar es Salaam na kuukosa mchezo dhidi ya Kagera Sugar unaotarajiwa kupigwa leo Jumatatu kwenye Uwanja wa Kambarage, Shinyanga.

Mzee Mkude alikuwa akisumbuliwa na matatizo ya figo na alifikishwa katika Hospitali ya Mwananyamala jijini Dar siku tatu kabla ya kufikwa na umauti huo jana Jumapili akiwa katika hospitali hiyo ya Mkoa wa Kitatibu wa Kinondoni.

Mkude amesema kuwa, baba yake alifariki saa 10 alfajiri ya jana Jumapili na mipango ya mazishi itapangwa baada ya yeye kuwasili jijini Dar akitokea Shinyanga ambako timu yake ipo kwa ajili ya mchezo wa Ligi Kuu Bara dhidi ya Kagera Sugar.

“Ni kweli mzee amefariki leo (jana) saa kumi alfajiri katika Hospitali ya Mwananyamala pale. Alikuwa akisumbuliwa na matatizo ya figo na alipelekwa pale kama siku tatu hivi nyuma kabla ya kufariki.

“Mungu akipenda tunatarajia kuzika Jumatano (keshokutwa), lakini kupata uhakika kamili mpaka nitakapofika Dar kutoka huku Shinyanga kwa sababu wananisubiri nifike ili tupange utaratibu mzima wa mazishi,” alisema Mkude.

Wakati huohuo, uongozi wa Simba kupitia kwa Mwenyekiti wa Kamati ya Usajili, Zacharia Hans Poppe, umesikitishwa na msiba huo na kusema kuwa wapo bega kwa bega na Mkude na tayari wameshampa ruhusa ya kurejea Dar kuungana na familia yake.

“Uongozi wa Simba tumepokea kwa masikitiko sana taarifa hizi, lakini Mungu ndiye mwamuzi, hakuna wa kulaumiwa,” alisema Hans Poppe.

SALEHJEMBE, INATOA POLE KWA MKUDE NA FAMILIA YAKE

MWENYEZI MUNGU AILAZE MAHALI PEMA