YANGA YAMUWASHIA TWITE TAA YA KIJANI, RUKSA...

Siku chache baada ya beki wa Yanga, Mbuyu Twite kuvurugana na kocha wake, Hans van Der Pluijm, uongozi wa timu hiyo, umemwambia mchezaji huyo kuwa yupo huru kuondoka kama ataona inafaa kufanya hivyo.

Baada ya mvurugano huo uliotokea kwenye mechi dhidi ya Stand United, Jumanne iliyopita, Twite alisikika akisema bora aondoke yeye klabuni hapo kuliko kuendelea kufanya kazi na kocha huyo.

Katibu Mkuu wa Yanga, Dk Jonas Tiboroha amesema kuwa Twite hakupaswa kusema hivyo kwa sababu yeye ni mchezaji mkongwe na ni profesheno, alipaswa kutulia na siyo kuanza kujibishana na kocha.

“Makosa yalikuwa ya kwake (Twite), Rajabu Zahir na kipa Dida (Deogratius Munishi). Kama aliona kocha hakumtendea haki hakupaswa kumjibu mbele za watu ila kama anataka kuondoka milango ipo wazi, kwani hakuna mtu yeyote aliye juu ya Yanga,” alisema Tiboroha.

Mkataba wa Twite kuitumikia Yanga unatarajiwa kumalizika hivi karibuni baada ya Ligi Kuu Bara kumalizika msimu huu.