ZIMEBAKI SIKU TANO TU, YANGA INABEBA ZAKE UBINGWA

Huu ni msimu wa Yanga! Hivyo ndivyo unavyoweza kusema baada ya vijana hao wa Jangwani kuendeleza wimbi la ushindi kwenye Ligi Kuu Bara na sasa wamebakiza siku tano tu watawazwe mabingwa wa ligi hiyo.

Hii ni baada ya jana kupambana na kupata ushindi wa mabao 3-2 dhidi ya Stand United katika mchezo mkali uliopigwa kwenye Uwanja wa Taifa jijini Dar es Salaam, uliohudhuriwa na mashabiki wachache.

Yanga iliingia kwenye mchezo huo, zikiwa zimepita siku mbili tu tangu ipate sare ya bao 1-1 dhidi ya Etoile du Sahel kwenye mchezo wa Kombe la Shirikisho.

Ushindi wa jana, unaifanya Yanga iwe imeweka rekodi ya kushinda michezo sita mfululizo kwenye Ligi Kuu Bara na kuonekana kama tayari imeshausogeza ubingwa Jangwani.

Yanga hivi sasa imejikita kileleni mwa msimamo ikiwa na pointi 49 na inatakiwa ishinde michezo miwili tu ijayo itakayochezwa ndani ya siku tano zijazo ili iutwae ubingwa. Michezo hiyo ni dhidi ya Polisi Moro keshokutwa Ijumaa kwenye Uwanja wa Taifa na ule dhidi ya Ruvu Shooting Jumatatu ijayo kwenye uwanja huo.

Kama Yanga ikishinda michezo hiyo, itafikisha pointi 55 ambazo haziwezi kufikiwa na timu yoyote ile, kwani Azam FC ipo nafasi ya pili ikiwa na pointi 42 na kama ikishinda michezo yake yote iliyobaki, itafikisha pointi 54.

Hivi sasa Yanga ambayo imeshinda mechi zote za ligi zilizofuata tangu ifungwe na Simba Machi 8, imeiacha Azam FC kwa tofauti ya pointi saba.

Baada ya mchezo wa jana, Kocha Hans van Der Pluijm, alisema: “Mchezo ulikuwa mzuri lakini hatukuwa katika kiwango chetu.”

Naye Kocha wa Stand, Mathias Lule, alisema wamesikitishwa kupoteza mchezo huo kwa kuwa walipambana kadiri ya uwezo wao lakini akatamba watahakikisha wanashinda michezo yao mitatu iliyobaki ili kujinusuru na kushuka daraja.

Stand United inabaki katika nafasi ya tisa ikiwa na pointi 28.

Yanga waliuanza mpira kwa kasi na dakika ya nne tu Mbrazili Andrey Coutinho, aliyerejea dimbani baada ya kukaa nje ya uwanja kwa miezi miwili kutokana na kuumia katika ushindi wa 3-1 dhidi ya Mbeya City, Februari 22, alipiga shuti kali lililokwenda nje kidogo ya lango.

Vinara walifanya mabadiliko ya wachezaji wanne katika kikosi kilichotoka sare ya 1-1 na Waarabu, Etoile du Sahel, baada ya kuwaanzisha Deogratius Munishi ‘Dida’, Said Juma Makapu, Rajab Zahir na Andrey Coutinho.

 

Yanga ndiyo walioonekana kuanza kwa kulisakama lango la wapinzani wao huku Stand wakifanya mashambulizi ya kushtukiza.

Hata hivyo, Stand walikuwa wa kwanza kuliona lango la Yanga katika dakika ya 19 kupitia kwa Kheri Mohammed baada ya kumzidi ujanja kipa Dida aliyekuwa ametoka katika eneo lake.

Baada ya hapo, Yanga walizidi kulisakama lango la Stand na kufanikiwa kusawazisha dakika ya 30 kupitia kwa Amissi Tambwe aliyefunga akipokea pasi ya Mrisho Ngassa.

Ngassa aliifungia Yanga bao la pili dakika ya 45 baada ya kugongeana vizuri na Juma Abdul kisha kuachia shuti lililotinga kwenye wavu wa juu.

Wakati Yanga wakidhani mambo yameshakuwa rahisi kwao, Kheri aliingia tena wavuni dakika ya 65 na kufanya matokeo kuwa 2-2.

Iliwalazimu Yanga wapambane kupata bao la ushindi ambalo lilipatikana kwa njia ya mkwaju wa penalti dakika ya 79, iliyotumbukizwa na Simon Msuva baada ya Tambwe kufanyiwa madhambi ndani ya eneo la hatari.  

Baada ya mchezo huo, kocha Hans van Der Pluijm alionekana akizozana na beki wake Mbuyu Twite akimlaumu kucheza chini ya kiwango lakini raia huyo wa Rwanda naye alisikika akimjibu kuwa wachezaji wengi walicheza chini ya kiwango, hivyo haikuwa sahihi kumlaumu yeye tu.