TAARIFA ZA KUSAINI YANGA KWA MAMILIONI ZAMSHITUA NIYONZIMA

Kiungo wa Yanga, Haruna Niyonzima amesema bado anaendelea kuusikilizia uongozi wa Yanga huku akisubiri pia mipango yake mingine.

Niyonzima raia wa Rwanda, amezungumza na SALEHJEMBE na kusema kwamba taarifa zilizozagaa mitandaoni, zilikuwa ni uzushi mtupu.

“Nimeona taarifa mitandaoni kuhusiana na mimi kusajili Yanga sijui kwa shilingi milioni mia na ngapi.

“Nimeshangazwa sana, najiuliza hawa watu wanaozusha mambo yanawasaidia nini. Kama nikisaini, wala haiwezi kuwa siri hata kidogo.

“Lakini kwa sasa kwa kuwa sijasajili, kwa nini watu wazushe na kufanya mambo yawe ya kudanganya na kulazimisha,” alisema Niyonzima akionyesha kutopendezwa na taarifa hizo.

Mkataba wa Yanga na Niyonzima, unatarajia kufikia tamati ndani ya siku 60.

Niyonzima ambaye alikuwa injini ya Yanga amekuwa akisisitiza, ataendelea kusubiri huku akipa nafasi Yanga, lakini ofa yake kutoka Uturuki pamoja na ile ya Afrika Kusini, pia anazipa nafasi.