BUSUNGU, ISIHAKA WAONYESHANA KAZI MAZOEZI STARS

Mshambuliaji mpya wa Yanga, Malimi Busungu, ameanza kuonyesha makali yake uwanjani baada ya kumpa wakati mgumu beki na nahodha wa Simba, Hassan Isihaka wakati wa mazoezi ya timu ya taifa, Taifa Stars, jana.

Katika mazoezi hayo, yaliyofanyika kwenye Uwanja wa Gymkhana, Posta jijini Dar es Salaam, Kocha Mkuu wa Stars, Mart Nooij alianza kwa programu ya kukimbia mbio fupi na baadaye ndefu iliyotumia dakika 10.

Baadaye vilipangwa vikosi viwili na ndipo Busungu na Isihaka wakapangwa tofauti, Busungu alikuwa namba tisa na alikuwa akikabwa zaidi na Isihaka pamoja na Joram Mgeveke.

Busungu aliyetua Yanga hivi karibuni akitokea Mgambo, alikuwa msumbufu kwa beki huyo ambapo alifanikiwa kumtoka mara kadhaa na kupiga mashuti mbele yake.

Licha ya mshambuliaji huyo kufanya vitu vyote hivyo, hadi filimbi ya mwisho inapulizwa na Nooij, hakupata bao katika mazoezi hayo.

Aidha, katika mazoezi hayo, Nooij aliwabadilisha nafasi za uwanjani Deus Kaseke wa Yanga na Rashidi Mandawa wa Mwadui.

Kaseke ambaye wakati akiwa Mbeya City alikuwa akitumika kama kiungo wa pembeni, jana alipangwa namba nane huku Mandawa akicheza namba 11 wakati alipokuwa Kagera Sugar alikuwa akitumika katika nafasi ya mshambuliaji wa kati (namba tisa).

Alipoulizwa Kaseke kuhusiana na kubadilishwa namba alisema: “Mimi ni kama mfungwa ambaye hachagui gereza, hivyo kubadilishwa namba kwangu ni moja ya changamoto nitakazoweza kukutana nazo Yanga.

“Nina uwezo wa kucheza nafasi zote za ndani ya uwanja isipokuwa kipa pekee, ni vema mashabiki wa soka wakalifahamu hilo.”