JEZI MPYA TAIFA STARS HAIWEZI KUWA UKOMBOZI WA KINACHOTUUMIZA

Na Saleh Ally

HALI ilivyo katika kikosi chetu cha Taifa Stars lazima tukubali kwamba si nzuri na hakuna matumaini ya kucheza Kombe la Mataifa Afrika au lile la timu za nyumbani maarufu kama Chan.

Matumaini hakuna kutokana na hali halisi, kwamba hatuna mwendo mzuri, si timu inayosomeka kwa Watanzania kwamba inataka kufanya jambo.

Wakati yote hayo yakiwa yamejazana katika vichwa vya Watanzania, Shirikisho la Soka Tanzania (TFF) limefanya hafla iliyokuwa na mambo mengi, si vibaya kuyapongeza.

Hafla hiyo iliyofanyika juzi, TFF iliwatuza watu mbalimbali waliopambana katika kusaidia soka ya Tanzania tokea nchi yetu ilipojiunga na FIfa miaka 50 iliyopita.

Hongera TFF kwa kuwakumbuka wachezaji na viongozi wa zamani. Hongera sana kwa TFF kwa kuwajali wadhamini wao kwa miaka nenda rudi, najua hamkuwaweka Serengeti au SBL kwa kuwa mko na Kilimanjaro na TBL, lakini nao walistahili pongezi kwa kuwa si lahisi kuwang’oa katiaka historia.

SBL au Serengeti ndiyo walikuwa changamoto hadi TBL wakiwa na Kilimanjaro wakaona Taifa Stars inaweza kudhamini. Bado nao walistahili kupongezwa pia.

Pia hongera TFF, mmewakumbuka waandishi wakongwe wa enzi zile. Sitaki kuwalaumu mliwasau wa sasa ambazo wanawasaidia kusukuma gurudumu lenu ambao pia walipaswa kuunganishwa, hiyo si ishu kubwa.

Lakini bado niliona mlipaswa kuwapongeza wadhamini wa sasa kama vile Bin Slum Tyres ambao wamefanya mambo makubwa kwa kudhamini timu tatu katika ligi moja, tena timu ambazo hazikuwa na majina makubwa na mbili kati ya hizo, ndiyo zilikuwa zimepanda daraja.

Huenda Bin Slum Tyres, ndiyo walikuwa wadhamini jasiri kuliko wengine wote baada ya kujitolea kuwekeza kwa timu zilisizoaminika. Utaona udhamini huo ulivyokuwa changamoto na kila timu ikapambana isiteremke daraja, kweli zote tatu yaani Mbeya City, Stand United na Ndanda FC zimebaki Ligi Kuu Bara.

Lakini nilichokuwa nakilenga zaidi ni ile ishu ya uzinduzi wa jezi mpya ambao ulikuwa ni sehemu ya shughuli hiyo. Zimezinduliwa jezi, ambazo kwangu sioni kwama kuna haja ya kuzikagua sana, tunaweza kwenda nazo.

Kila mmoja wetu aliye makini anaweza kujiuliza kuhusiana na jezi hizo mpya, kwamba je, ndiyo suluhisho la matatizo yetu kwa kuwa tunajua tuna kikosi dhaifu?

Stars haionyeshi kama ina nia ya dhati ya kufuzu au kufika mbali. Haionekani kama ina kikosi chenye nguvu ya kusonga, zaidi wote tunawabebesha mzigo baadhi ya wachezaji wachache kama Mbwana Samatta na Thomas Ulimwengu kwamba ndiyo watakuwa msaada. Tutawaonea.

Lazima tukubaliane, jezi inaweza ikawa ni sehemu ya mabadiliko madogo sana na huenda yasiwe na tija hata kidogo kama Stars itaendelea kuboronga au kuwa timu ya kubahatisha.

Lazima tukubaliane, Watanzania wanataka kuona timu yao inacheza Afcon au Chan, halafu ifuatie Kombe la Dunia. Suala la jezi ni chembe ndogo ambayo kama ingekuwa ni kidonda, basi ni kile kisichoweza kumzuia mchezaji au mkimbiaji kushiriki mashindano.

Tumeona jezi zimezinduliwa, lakini hiyo bado haijabadilika hata kidogo nguvu na fikra ya nini cha kufanya ili tucheze michuano hiyo mikubwa.

Hongera TFF kwa kubadili jezi, ni wazo zuri lakini bado hiyo si ndoto ya Watanzania. Wanachotaka ni kikosi cha TAifa Stars kufanya vizuri na kufikia ndoto sahihi ambayo ni kushiriki michuano mikubwa ya Afrika.

Tanzania inaweza kushiriki Afcon na Chan kwa kuwa imewahi kushiriki michuano yote hiyo. Hivyo naweza kusema kwa uhakika, ndoto wanazoota Watanzania si za Alinacha, ni kitu kinachowezekana. Hii ina maanisha, ni deni kwa uongozi wa Jamal Malinzi kwamba hata ajitahidi vipi, kama Stars haitafanya vema, basi kila kizuri ikiwemo kubadili kwa jezi, hakutakuwa na tija hata chembe.