SAWA BLATTER NA KESI YA RUSHWA, ILA KUONDOKA KWAKE KUNA FAIDA GANI TANZANIA NA AFRIKA?

Na Saleh Ally

NIMEWASIKIA watu wengi wakitoa maoni yao kuhusiana na kujiuzulu kwa Rais wa Shirikisho la Soka la Kimataifa (Fifa), Joseph ‘Sepp’ Blatter.

Blatter, raia wa Uswisi, ameamua kuachia ngazi baada ya kuwa kwenye usukani kwa miaka 17, tena akiwa ameshinda mara nyingine, lakini kashfa ya rushwa imemuondoa.

Wakati Blatter anaondoka, kila mmoja anaweza kusema lake na huenda wengine wakaingiza ushabiki wakiona ulikuwa ni utawala wa muda mrefu na alistahili kuondoka.

Nilivyoona, wengi walifananisha uongozi wa Fifa na uongozi wa nchi, kwamba kuna mhula wa kwanza na wa pili kama ambavyo sasa Rais Pierre Nkurunziza anavyopata wakati mgumu kutokana na kutangaza kugombea muhula wa tatu.

Blatter ameondoka lakini si kwa faida ya Afrika wala Tanzania, Blatter ameondoka kwa kuwa Marekani, Uingereza na Ufaransa hawamtaki na siku zote wamekuwa wazi katika hilo.

Mataifa hayo makubwa matatu, yameungana. Awali walikuwa Waingereza, Ufaransa nao wakaingia lakini safari hii wakatumia kigezo cha zile fedha za rushwa zilizopitia Marekani na Shirika la Kijasusi la FBI, likawa na nafasi ya kuingia.

Mkurugenzi wa FBI, James Comey amesema wazi, kwamba hata ingekuwa senti lakini kama fedha hiyo imegusa katika anga za Marekani, basi inawahusu.

Jibu lake lilitokana na maswali mengi, kwamba hawa Marekani ambao mpira kwao ndiyo unaanza kuingia, tena hawaupendi kihivyo, vipi leo wavalie njuga suala la rushwa Fifa?

Bado kuna ishu ya michuano ya Kombe la Dunia, mwaka 2018 nchini Urusi na 2022 kule Qatar. Waingereza, hawakufurahia. Ufaransa pia wanaona si sawa, lakini Wamarekani walijaribu, wakapigwa chini pia na 2018 imekwenda kwa wapinzani wao wakubwa kisiasa.

Mataifa hayo makubwa yamejaribu hata kukumbushia Kombe la Dunia mwaka 2010 ambalo lilifanyika kwa mara ya kwanza Afrika. England ilikuwa nchi iliyopinga kweli kwa madai bado bara hili halijafikia kuandaa michuano hiyo mikubwa, kisingizio kingine ni usalama mdogo wa Johannesburg na miji mingine ya nchi hiyo.

Kombe la Dunia lilifanyika bomba sana, naweza kuwa shahidi maana nilikaa Afrika Kusini mwanzo hadi mwisho nikitembea katika miji ya Johannesburg, Cape Town, Darbun na mingine mingi, wezi walikwenda likizo, wakatulia kushuhudia boli, England wakawa kimya.

Ukiangalia michuano sita ya Kombe la Dunia, Ulaya imepewa mara mbili. Anzia mwaka 2002 (Asia), 2006 (Ulaya), 2010 (Afrika), 2014 (Amerika Kusini), 2018 (Ulaya) na 2022 (Asia).

Utaona katika hizo mara sita, Ulaya ya Kati na Magharibi imepata mara moja wakati Ujerumani ilipoandaa mwaka 2006. Baada ya hapo ni Afrika, Amerika Kusini, Ulaya Mashariki na Asia tena.

Waingereza wanaona wanadharauliwa, Wafaransa wameshawishika na sasa Wamarekani wameingia na hakuna ubishi, Blatter na Fifa yake, kweli watakuwa wanakula rushwa, lakini kero ya kuona hawapewi nafasi ya ukubwa walionao, sasa wameamua kuuonyesha.

Mimi sina haja ya kuangalia nchi ipi imepewa, ninachoangalia Tanzania inapata nini. Tumeona Blatter alivyosukuma mabilioni ya dola kuja Afrika. Amefanya hivyo ili afaidike na kura wakati wa uchaguzi kutoka Afrika (Caf) na Asia (AFC).

Kweli mabara haya mawili ndiyo yanayoongoza kumuunga mkono yakifuatiwa na Amerika Kusini. Blatter anafaidika, nayo yanafaidika. Kusherehekea kuondoka kwa Blatter ambaye sasa anaondoka na vazi lililokuwa linatusitiri ni kushabikia usichokijua.

Kamwe sitaki kushabikia Umarekani wala Uingereza kwa kuwa mimi ni Mtanzania nisiye na nyumbani kwingine. Bado sijui anayekuja kuchukua usukani kwa kuwa hali halisi inaonyesha Wazungu watageuka na ikiwezekana hatakuwa Prince Ali wa Jordan, badala yake wataangalia Mzungu mwenzao kama Luis Figo au Michel Platini ambaye wanaamini atawaunga mkono.

Simlilii Blatter na kuondoka kwake, kama alifanya makosa, kweli anastahili kuyatumikia, lakini wanaohakikisha anaondoka kwa maslahi yao, unafikiri watajali maslahi ya Tanzania? Hii ndiyo hofu yangu.

Kwamba gwiji huyo alikuwa na makosa yake, lakini Tanzania imefaidika na viwanja vya nyasi, kozi za makocha, waamuzi na hata fedha. Kama hazikuwa na faida labda Shirikisho la Soka Tanzania (TFF), halikuzitendea haki kwa ajili ya maendeleo.

Baada ya Blatter, Mzungu anayekuja kweli ataikumbuka Tanzania? Nchi inayobaki ilipo kila siku katika soka? Tena ukiangalia, tayari Wazungu wameshaanza kuzungumzia ukubwa wao, sisi Tanzania tu wachanga kila kukicha! Eeh Blatter, nenda babu, ila siku itafika, watakukumbuka tu.