KWA MWENDO HUU, HATA MKWASA ATASHINDWA

Na Saleh Ally

KOCHA Mart Nooij ameondoka Tanzania akiwa ameweka rekodi ya aina yake. Kwamba katika mechi zaidi ya 15, alikuwa ameiongoza Taifa Stars kushinda mechi tatu tu!

Kocha huyo Mholanzi alionekana ndiyo tatizo kubwa, hakika hakustahili na kumuondoa ilikuwa sahihi kabisa.

Huenda kuchelewa kwake kuondoka kumekuwa tatizo kubwa zaidi kwa TFF kwa kuwa amejikuta akilazimika kusindikizwa na askari utafikiri ni kiongozi wa serikali.

Watanzania walionekana kumchoka Nooij kuliko TFF ambao ndiyo walikuwa wakifanya naye kazi. Huenda walitaka kujaribu tena na tena, lakini imeshindikana.

Taarifa nyingine zilieleza TFF walishindwa kumng’oa Nooij mapema kwa kuwa fedha za kuvunja mkataba zilikuwa nyingi sana. Huenda ni wakati mwingine wanapaswa kujifunza kuwa na mikataba bora ambayo ina urahisi wakati wa kuvunja.

Lakini kulikuwa na taarifa nyingine kwamba si Jamal Malinzi, lakini kuna kiongozi mwingine ndani ya TFF mwenye sauti hata kuliko rais huyo wa shirikisho ndiye alikuwa akizuia kocha huyo asiondoke.

Alikuwa akizuia kutokana na maslahi yake binafsi, kwamba yeye ana urafiki wa karibu na kocha huyo. Hivyo aliendelea kushawishi asiondoke.

Yote hayo yanaweza kuwa kweli au la, lakini ambacho TFF wanapaswa kusisitiziwa na kukumbushwa ni kwamba mabadiliko waliyoyafanya kwa kumng’oa Nooij na kuvunja benchi lake la ufundi, lazima wakumbuke wamemshusha konda na kumuacha dereva.

Kama kweli imeonekana mwendo wa daladala haukuwa sahihi, halafu wameamua kumuondoa konda na kumuacha dereva, basi mwendo utaendelea kuwa uleule hata kama atajirekebisha kwa muda, mwisho atajisahau tu.

Nasisitiza, uamuzi wa kumuondoa Nooij ulikuwa sahihi kabisa lakini ukweli kuvunja benchi la ufundi bila ya kumuondoa mshauri wa ufundi wa Rais wa TFF katika masuala ya ufundi, Pelegrinus Rutayuga ni kutwanga maji kwenye kinu.

Rutayuga ameshiriki katika mechi, ushauri wake umeifanya TFF kupotea katika mengi. Hivyo ni lazima naye alipaswa kuondoka kwa kuwa ndiye dereva wa masuala ya ufundi.

Kama anamshauri Rais wa TFF, Jamal Malinzi, basi ndiye alihusika na ujio wa Nooij, ndiye alishiriki katika vitu vingi vilivyohusiana na ufundi ambao umefeli.

Rutayuga ndiye amekuwa dereva wa ufundi wa Taifa Stars ambao umefeli. Hivyo kuondoa mkono na kuacha kiwiliwili chote na kichwa ni kazi bure kujisifia kuwa kuna mabadiliko.

Kuna baadhi ya wachezaji wa Stars waliniletea malalamiko kuhusiana na Rutayuga, lakini tatizo likawa moja kwamba hawataki kutajwa, pili hawataki kufafanua kwa undani zaidi, jambo ambalo niliona si sahihi.

Lengo si kumshambulia Rutayuga, hivyo lazima kama ni shutuma, ziwe zenye uhakika na ukweli. Huenda wao waliona kuna hofu ya kumuogopa kama ambavyo wachezaji wamekuwa na hofu. Hapa hilo halipo.

Msisitizo ilikuwa ni lazima wao wawe wazi. Matatizo hayo tunaweza tukawa tumeshindwa kuyajua kwa kuwa wao wanaficha, lakini hili la Rutayuga kufeli na Stars kufanya vibaya zaidi katika kipindi yeye akiwa mshauri, wala halina majadala.

Inawezekana kuna matatizo mengi ambayo yamejificha, kama wachezaji hao wangekuwa jasiri kusema tungeweza kujua ukweli. Ukimya wao, unatufanya tubaki na maswali kwamba tatizo ni nini!

Pamoja na woga wao, bado tunaweza kunusa harufu ya tatizo pia kwamba uwepo wa washauri wasiokuwa na uwezo pia ni tatizo kubwa.

Tusizungushe mambo, Rutayuga si mshauri ambaye anaweza kuisaidia Tanzania kutokana na rekodi zake kiuwezo. Ndiyo maana hata siku ile nilipokutana naye, zaidi alijisifia mafunzo yake ya fitna kutoka kwa Mwenyekiti wa zamani wa TFF, Muhidini Ndolanga.

Taifa Stars haihitaji fitna kama za Ndolanga ambaye wakati wake alishindwa kuisaidia na kuwa moja ya timu za hovyo kabisa. Sasa huyu aliyechukua mafunzo kwake ataisaidia vipi timu hiyo?

Malinzi lazima akubali kwamba mshauri wake hakuwa na msaada na hana msaada sasa kama ataendelea kuwa hapo kwa masuala ya ufundi. Hivyo asichelewe kwa mara nyingine kama ilivyokuwa kwa Nooij, amuondoe.

Vizuri atafutwe mshauri mwenye taaluma ya ukocha tena mwenye uwezo na rekodi za juu kabisa. Mshauri ambaye ana uwezo wa masuala ya kiufundi kwa ajili ya kusaidia timu yetu. Kama ni suala la kulipa fadhila, inatosha na mkumbuke Stars ni timu ya Watanzania na wao wanapoona kuna tatizo, wakati mwingine ni vizuri kuwasikiliza.