TFF YAAMUA KULIINGILIA SUALA SIMBA, MESSI, YAWAITA JUMANNE

Shirikisho la Soka Tanzania (TFF) sasa limeamua kuliingilia sakata la Simba na kiungo wake mshambuliaji, Ramadhani Sinagano.

Singano maarufu kama Messi analalamika kwamba mkataba wake na Simba ni wa miaka miwili na umemalizika msimu uliopita, yaani 2014-15.

Lakini Simba imekuwa ikisisitiza kwamba ina mkataba wa miaka mitatu na kiungo huyo na utafikia tamati msimu wa 2015-16.

Sakata hilo tayari limezua gumzo kubwa karibu kila sehemu ambayo michezo ya Tanzania inasikika na hasa soka.

Lakini TFF imesema imepokea kwa masikitiko makubwa taarifa za mgogoro wa kimkataba kati ya Mchezaji Ramadhani Singano wa klabu ya Simba.

“TFF imeagiza mwakilishi wa klabu ya Simba pamoja na mchezaji wa Simba wafike ofisi za TFF siku ya Jumanne tarehe 9 mwezi huu kwa mazungumzo ili kufikia mwafake,” alisema Msemaji wa TFF, Baraka Kizuguto.

“Kila upande umetakiwa uje na vielelezo vyake. Ila katika kipindi hiki cha kuelekea kwenye mazungumzo,TFF inaziasa pande zote mbili zijiepushe na kutoa matamko yanayoweza kuchochea hali ya kutoelewana na kuamsha hisia mbaya katika familia ya mpira wa miguu Tanzania.”