ASEEE…LILE BAO LA MWASHIUYA NI SALAMU MOJA KWA MOJA KWA KAMATI ZA USAJILI

MWASHIUYA

Na Saleh Ally

NILIPATA kurudia mara kadhaa kupitia king’amuzi kuangalia mara nyingine tena na tena bao ambalo alifunga kinda Geofrey Mwashiuya wakati Yanga ikipambana na Telecom ya Djibouti.

Kila binadamu ana nafsi isemayo ukweli, unaweza kudanganya au kukataa kama utaipuuza tu. Baada ya kuliangalia bao hilo kwa kiasi nilichoona nimeridhika, nikatamka “bonge la bao.”

Hakika lilikuwa ni bonge la bao, kwani Mwashiuya alifunga baada ya kuwatoka mabeki wawili kwa kasi kubwa lakini kabla alimzidi mmoja mbio akitokea pembeni, akaingia ndani ya 18 na kufunga.

Kabla ya kufunga, utaona anabadilisha mguu na kupiga shuti na mwingine. Vitu ambavyo angeweza kufanya mchezaji nyota kabisa na tegemeo huenda kama Kpah Sherman, Amissi Tambwe ambao kati yao, sijawahi kuona akifunga bao kama hilo.

Bao la Mwashiuya limejaa mambo mengi ambayo anaweza kuwa nayo mchezaji aliyefundishwa kwenye akademi akapikika kweli kufikia hapo.

Bado niliona bao hilo limejaa hali ya kujiamini isiyo ya kawaida ambayo angeweza kuifanya mchezaji aliyeshiriki michuano kama ya Kagame mara mbili au tatu kabla ya kufikia kujiamini alivyofanya bwana mdogo huyo ambaye hata Ligi Kuu Bara hajawahi kucheza zaidi ya Ligi Daraja la Kwanza, tena akiwa na timu ya Kimondo ambayo hata daraja haikupanda!

Achana na bao, angalia krosi zake tatu. Moja aliitumia Malimi Busungu kufunga bao, moja akakosa na nyingine pia haikutumika vizuri. Zote zilikuwa na macho na utengenezaji wake hadi kufikia kuwa krosi, inaonekana kuna ubunifu mkubwa wa kinda huyo.

Jibu sahihi nililolipata ni kwamba, Mwashiuya ni kati ya wachezaji wenye vipaji vya juu kabisa ambaye Tanzania imempata baada ya Mbwana Samatta ambaye sasa yuko DR Congo akiichezea TP Mazembe.

Utaona mambo kadhaa wanalingana, kwanza kujiamini, uchezaji wa kasi na utumiaji akili, lakini hata kabla ya ligi kuu, tayari anaonyesha uwezo mkubwa kimataifa kama ambavyo Samatta ambaye hakuwa na uzoefu mkubwa lakini akawapa shughuli Mazembe hadi wakaamua kumsajili.

Lengo hapa si kumvimbisha kichwa Mwashiuya. Mara nyingi nimekuwa nikiwasikia mashabiki wa soka wakisema wachezaji wanaharibiwa kwa kuvimbishwa vichwa na vyombo vya habari.

Mimi ninafanya kazi yangu kuelezea nilichokiona na nini cha kufanya. Kama kweli Mwashiuya ‘atakufa’ kwa mimi kueleza hali halisi, basi hilo ni tatizo lake.

Nichachoona cha msingi hasa ni kamati za usajili za klabu kurejea na kukaa chini ili zione kama zinaweza zikatumia nguvu nyingi kurejea mikoani au katika timu za daraja la kwanza na kwingineko kuwaangalia vijana wetu kwa kuwa inaonekana kuna kina Samatta na Mwashiuya wengi sana, sema mmekuwa mkikimbilia kwenye usajili wa kusikika sana na kuwafurahisha mashabiki wengi.

Kusajili wageni si jambo baya, lakini lazima tukubaliane, Tanzania si nchi ya kumpapatikia mchezaji kama Michael Olunga wakati tuna wengi sana wenye uwezo maradufu na bora kuliko wake.

Kamati za usajili, ziwe ni zile zinazoamini kuwa Tanzania ina vipaji vingi na kuwe na sababu ya kuwatafuta kwa kupanga utaratibu bora kabisa wa kuwafikia. Tena vizuri kuwe na programu ya muda mfupi na mrefu.

Kama Samatta alipatikana, leo anakuja Mwashiuya, lazima wapo wa zaidi yao, chini yao au wanaolingana nao na bado wanaweza kuzisaidia timu zetu na baadaye timu za taifa.

Tafadhali, tuachane na imani kuwa vipaji bora kwa maana ya wafungaji na viungo, vinapatikana katika nchi jirani za Kenya, Uganda, Rwanda na kwingineko. Vijana wapo wengi, vizuri muwafuate au wafuatilieni.