CCM KESHO WANASUBIRI FAINALI, COASTAL UNION WAMEBANDIKA VIONGOZI KWA KIBABE HUKU WAKITAKA UMOJA

Na Saleh Ally

NDIYO maana mara nyingi nimekuwa nikisisitiza sipendi mambo mengi yanayohusiana na siasa kwa kuwa yamejaa unafiki, uongo na uzandiki.

Watu wengi wapo kwenye siasa kwa ajili ya kujitumikia wao, wachache sana wamekuwa wapo pale kwa ajili ya kuwatumikia wananchi ambao ndiyo wanakuwa mabosi wao.

Kesho, Chama Cha Mapinduzi (CCM), kitakuwa katika mchakato mkubwa kumsaka mgombea wake wa urais mjini Dodoma.

Hofu imejaa, wapo wanaoamini wanaonewa, wapo wanaosubiri kupendelewa, wapo wanaojiandaa kwa lawama lakini siku ya mwisho Wana-CCM ndiyo wataamua wanamtaka nani.

Uchaguzi wa kitu ni haki kupitia kura na ili kuepusha hofu na kujenga umoja, basi lazima kuwe na haki katika zoezi zima.

Haki inaondoa mengi yakiwemo ya kutoaminiana na kuua upendo. Huenda Coastal Union wanaweza kuwa kati ya waliofanya uchaguzi wao kwa kuangalia matakwa ya wachache na si wote.

Uchaguzi wao uliofanyika wiki iliyopita, ulijaa mizengwe kupitiliza na unaweza kusema mambo mengine yalikuwa kichefuchefu.

Eti viongozi wote walio kwenye uongozi wa Coastal Union walipita bila kupingwa baada ya wanachama wengine kuzuiwa kuingia ukumbini kwa madai hawakuwa wamepewa kadi.

Awali kupitia usimamizi wa Shirikisho la Soka Tanzania (TFF), waliwaeleza wanachama wenye kadi na wale wenye risiti za benki wakiwa wamesajiliwa kwenye klabu pia watapiga kura kwa kuwa tayari ni wanachama halali.

Baadaye wakiwa ukumbini utaratibu ukabadilika, maelezo yakawa tofauti na wale waliokuwa wamelipia benki kabla ya kupata kadi wakatolewa nje na baadhi yao walikuwa ni wagombea, hivyo kusababisha hata idadi ya wagombea kupungua na wajumbe wote wakapita bila kupingwa kama ilivyokuwa kwa viongozi wengine. Ni sawa na kubandika picha juu ya nyingine.

Hofu ya Wana-CCM ni kukosa haki, hali inayoweza kujenga chuki baadaye. Ndiyo maana kila mmoja yupo macho, fitna zinaendelea na kadhalika.

Coastal pia wamelifanya hilo tena waziwazi na baadhi wakaonekana kufurahia lakini wakasahau klabu yao imekuwa na migogoro miaka nenda rudi na inatakiwa kuwa na umoja wa wote ili kuirudisha kwenye hadhi yake ya juu kama moja ya klabu kongwe zilizowahi kuwa na mafanikio.

Coastal ndani yake tayari kuna ubaguzi, walishaanza kuitana ‘Waarabu na sisi’. Jambo ambalo nalo ni tatizo kubwa sana na kama likiendelea kupewa upenyo zaidi linaweza kuchangia kuleta shida kubwa.

Sitaki kusema uchaguzi urudiwe, lakini nataka kuwakumbusha Coastal Union kwamba fitna za uoga wa kuepusha baadhi kutokuwa viongozi zimekuwa kubwa kuliko uwezo wa kupigania maendeleo katika klabu hiyo ambayo inakwenda kwa mwendo wa kusua licha ya ukubwa wake.

Inawezekana Coastal wamesahau kwamba msimu ujao umoja wao unahitajika zaidi kuliko wakati mwingine kwa kuwa wapinzani wao wakubwa African Sports ‘Wana Kimanumanu’ wamerejea Ligi Kuu Bara na itakuwa kazi kubwa kwao waanze kuchomoza ndani ya Tanga kwanza.

Inawezekana wapo watakaopinga kila nilichoandika katika makala haya. Lengo langu si kuwatenga zaidi Coastal Union, badala yake kuwakumbusha mambo mawili tu.

Kwanza, ni hilo la kuwa waliufanya uchaguzi wao kutokuwa wa haki, kubagua watu, kuingiza viongozi madarakani utafikiri Tanzania ya chama kimoja cha siasa, ile ya chagua mgombea au kivuli, kitu ambacho hakiwezi kuwa sahihi hata kidogo.

Kitu cha pili ni kwa kila upande wa Coastal Union, nimesikia tayari ambao hawakutendewa haki wamepinga matokeo hayo, ninaona wana haki.

Pamoja na hivyo, niwakumbushe umuhimu wa maisha ya klabu yao. Hivyo ikiwezekana wasamehe, waungane na walioshinda ingawa kimagumashi, waipiganie Coastal kupata maendeleo. Wale walioshinda, pia wawapokee.

Nina maanisha hivi, makundi ndani ya Coastal yavunjwe na upendo uwe sehemu ya muongozo ili kuianzisha Coastal Union moja na mpya ili mpira uchezwe uwanjani waungwana. Eehh!