ISHU YA NGOMA, CANNAVARO SAWA, LAKINI HILI NDILO TATIZO LA YANGA

Na Saleh Ally

BAADA ya Yanga kupoteza mchezo wake wa kwanza wa michuano ya Kombe la Kagame dhidi ya Gor Mahia, yanaweza yakasikika mengi sana yakiwemo ya kiufundi lakini mengi yanaweza kuwa ya kishabiki.

Lakini ukiangalia namna ambavyo Yanga walipoteza mchezo huo, lawama zote zinaweza kumuangukia Donald Ngoma ambaye alilambwa kadi nyekundu katika dakika ya 24 baada ya kumsukuma beki wa Gor Mahia.

Hakika Ngoma alipaswa kuwa mvumilivu, kutokuwa hivyo kumemfanya aiangushe Yanga. Lakini nilipotazama lile tukio nilijiuliza mara mbili, kwamba ningekuwa mimi ningeweza kuvumilia?

 Maana yule beki alisimama makusudi juu ya mguu wa Ngoma. Kweli uvumilivu ni muhimu sana. Je, Ngoma angeweza kuendelea kumvumilia aendelee kubaki juu ya mguu wake baada ya kumkanyaga kwa makusudi baada ya kuwa wameanguka ili aiokoe Yanga? Sijui!

 Lakini utamlaumu Ngoma, lakini unakumbuka jinsi nahodha Nadir Haroub ‘Cannavaro’ alivyotia mbwembwe na kuipoteza penalti muhimu? Huo ulikuwa wakati wake wa kufuta makosa ya Ngoma.

 Utagundua kilichotokea ni mambo ya soka lakini kuna mengi ya kujifunza kuanzia kwa Ngoma, Cannavaro na wengine walioshiriki mchezo huo. Yanga bado ina nafasi kubwa ya kuendelea kufanya vizuri na ikiwezekana kutwaa ubingwa.

Kikubwa nilichokiona mimi katika mechi hiyo haikuwa Ngoma wala Cannavaro kwa kuwa nilikuwa nikiiangalia Yanga iliyosajili kwa ajili ya michuano ya Ligi ya Mabingwa Afrika.

 Yanga inataka kucheza hatua ya makundi ya Ligi ya Mabingwa Afrika. Imechoka kuishia hatua za awali, lakini kuna kosa limefanyika na lisipofanyiwa kazi, hakika watalia.

Namba sita, au kiungo mkabaji. Waingereza wanamuita hub au roho ya timu. Yanga bado haina mchezaji sahihi kwa asilimia 80 au zaidi katika nafasi hiyo.

Mbuyu Twite kwa nafasi hiyo, anaweza kucheza lakini bado si sahihi. Salum Telela kweli ana uwezo, lakini uchezaji wake umekuwa ni maji kupwa, maji kujaa.

 Si mchezaji ambaye anaweza kuifanya kazi yake kwa ufasaha. Tokea ameondoka Athumani Iddi ‘Chuji’ ambaye alifanya vema, bado Yanga haijapata mchezaji sahihi wa nafasi hiyo.

Hata baada ya kutolewa kwa Ngoma, kama ingekuwa na mchezaji sahihi katika namba sita, basi yeye ndiye angepewa nafasi ya kuendesha timu. Lakini juzi ilikuwa vigumu kwa kuwa Twite angalau kidogo kwenye kulinda, si kutembeza timu kwenda mbele.

 Pia kwenye ukabaji, kama unakutana na wachezaji wenye kasi sana kama ile ya Mbwana Samatta, ambao ndiyo aina ya wachezaji wengi walio katika Ligi ya Mabingwa Afrika, Twite anaonekana kuwa na upungufu mwingi na mfano mzuri ni bao la pili walilofungwa Yanga na Michael Olunga.

Twite alikuwa karibu, lakini baada ya Olunga kutembea mbele ya Kelvin Yondani, akawa hana tena msaada.

 Wakati Yanga inaendelea kumkuza Said Juma ‘Makapu’ ambaye nina hakika akiendeleza anachofanya sasa atakuwa bora au wakiendelea kumpa nafasi Telela, bado wanastahili kusajili kiungo namba sita wa ukweli, yule ambaye atawachezesha na kuwalinda hasa katika michuano ya kimataifa.

 Kama watakuwa na namba sita ambaye ana upungufu mwingi kama huo nilioutaja, basi hatua ya makundi ya Ligi ya Mabingwa Afrika itaendelea kuwa hadithi tu kwa Yanga kwa kuwa wana makali ya kuweza kung’ata, lakini hawana uwezo wa kujilinda wasing’atwe.

Huenda kabla ya kwenda sehemu nyingine kutafuta kiungo, basi michuano ya Cecafa kupitia timu kama APR, Gor Mahia, Shandy na nyinginezo zinaweza kuisaidia Yanga kupata kiungo sahihi kwa ajili ya kazi hiyo.