LICHA YA BABA YAKE KUSEMA HAPANA, MSUVA AONGEZA ZAKE YANGA MIAKA MIWILI

MSUVA AKISAINI MBELA YA KATIBU MKUU DK JONAS TIBOROHA NA JEMBE JINGINE LA USAJILI LA YANGA, ISAAC CHANJI.

Kama amemkomesha baba yake mzazi vile, winga Simon Msuva amesaini mkataba mwingine wa miaka miwili ya kuendelea kuichezea Yanga inayojiandaa na Kombe la Kagame, Ligi Kuu Bara na Ligi ya Mabingwa Afrika.

Awali, baba wa winga huyo, Happygod Msuva, alimzuia mwanaye kusaini mkataba mwingine wa kuendelea kuichezea Yanga, badala yake aende Simba akapate changamoto mpya.

Baba yake Msuva mwenye mapenzi na Simba, alitaka kuona mwanaye anajiunga na timu hiyo kwa madai ameshaifanyia Yanga vitu vingi ikiwemo kuipa ubingwa wa ligi kuu msimu uliopita.

Msuva alisema ameingia makubaliano ya kusaini mkataba wa miaka miwili baada ya timu yake kumtangazia ofa nzuri ya mshahara na dau nono la usajili.

Msuva alisema, kabla ya kusaini mkataba huo wa miaka miwili, alikuwa amebakiza mwaka mmoja, hivyo jumla sasa ana mkataba wa miaka mitatu utakaomalizika 2018.

 “Hizo timu zinazoninyemelea kwa hivi sasa za hapa nchini, naomba ziniache kabisa kwani nimeshaongeza mkataba mwingine wa miaka miwili na Yanga kufikisha jumla ya miaka mitatu.

“Nimesaini Yanga bila ya kushawishiwa na mtu yeyote na kikubwa kilichonibakiza Yanga ni ofa nzuri niliyopewa,” alisema Msuva.

Kuhusu kauli za baba yake, Msuva alisema: “Hizo taarifa za baba kutaka kunipeleka Simba naomba kwa sasa ziishe na ninaomba ieleweke kuwa, mimi ninacheza soka kama kazi haihusiani na ushabiki wa baba kwa Simba.”

Msimu uliopita wa ligi kuu kiungo huyo aliweka rekodi ya kuwa mfungaji bora akipachika mabao 17, pia akatwaa uchezaji bora wa msimu mzima.