MAZOEZI YA KOCHA MPYA SIMBA YAWA KIVUTIO KWA MASHABIKI ZANZIBAR

Mashabiki kibao wamejitokeza kwenye mazoezi ya Simba yanayofanyika kwenye Uwanja wa Amaan visiwani hapa na kusifia kiwango kinachoonyeshwa mazoezini hapo.

Simba ipo visiwani hapa ikijiandaa na Ligi Kuu Bara inayotarajiwa kuanza Septemba 12, mwaka huu.

Kocha wa Simba, Dylan Kerr, akiwapa mazoezi makali wachezaji wake kama kupiga mashuti makali langoni huku akiwasisitiza kucheza kwa kupasiana.

Mashabiki ambao walijitokeza walikuwa wakipiga makofi mara kwa mara kuonyesha kuwa wanamkubali Kerr, raia wa Uingereza, ambaye amejiunga na Simba hivi karibuni.

Hata hivyo, mashabiki waliapa kuwa watakapocheza mechi za kirafiki na timu za visiwani hapa, basi hawataishangilia Simba bali watazipa sapoti timu za Zanzibar.