MVUA ZA LUSHOTO ZAVURUGA PROGRAMU YA MAZOEZI YA SIMBA

   

Leo Jumamosi Simba inatimiza siku sita tangu ilipoanza kambi yake wilayani hapa kujiandaa na msimu ujao wa Ligi Kuu Bara, ila mipango yake inatibuliwa na hali ya hewa ikiwemo baridi na mvua.

Awali, kikosi hicho kilichokuwa kikifanya mazoezi kwenye Uwanja wa Chuo cha Magamba, jana Ijumaa kililazimika kufanyia mazoezi yake kwenye Uwanja wa Chuo cha Irente Rainbow kutokana na barabara kuharibiwa vibaya na mvua zinazoendelea kunyesha kila siku.

Simba haitakuwa na mchezo wowote wa kirafiki mpaka itakapohamishia kambi yake visiwani Zanzibar.

Kocha Dylan Kerr anaonekana kuifurahia hali ya hewa ya hapa ambayo ni ya baridi kali lakini imekuwa tofauti kwa wachezaji ambao wanalalamika kila siku. “Ukiachana na mambo mengine kama ubovu wa barabara, mimi nimeridhika na hali ya hewa ya hapa,” alisema Kerr.

Jana Ijumaa wachezaji wa Simba waliokuwa Taifa Stars, walitarajiwa kujiunga na kambi ya timu hiyo ambao ni Mohammed Hussein ‘Tshabalala’, Said Ndemla na Hassan Isihaka. Pia Jonas Mkude aliyekuwa Afrika Kusini naye alitarajiwa kuwasili.