AZAM FC WAELEZA RASMI KUSHINDWA KUMSAJILI MOHAMMED TRAORE

Mipango  ya Azam FC imetibuka kwani haitampata straika Mohammed Traore kutoka El Merreikh ya Sudan ambaye ameng’ang’aniwa na timu yake kwani ndiye tegemeo lao.

Azam kwa muda mrefu imekuwa ikimnyemelea Traore raia wa Mali huku ikimtumia beki Serge Wawa kumnasa straika huyo, lakini mipango hiyo inaonekana kugonga mwamba.

Katibu wa Azam, Idrissa Nassoro, amesema wameshindwa rasmi kumsajili mchezaji huyo kwani El Merreikh imesema inamhitaji na haipo tayari kumuachia aondoke.

“Kuhusu Traore tumeshamkosa kwani El Merreikh walitueleza kuwa ndiye mchezaji wanayemtegemea kikosini, sasa hivi tunazungumza nao kuhusu kumsajili kwa siku za mbele zaidi,” alisema Nassoro.

El Merreikh iko katika hatua ya makundi kwenye michuano ya Ligi ya Mabingwa Afrika, inataka kumtumia Traore katika kufikia mafanikio msimu huu.

Kutokana na kumkosa Traore, Azam yenye ruhusa ya kusajili wachezaji saba wa kigeni, sasa ipo katika mchakato wa kusaka mchezaji mwingine kuziba nafasi waliyotaka kumsajili straika huyo raia wa Mali.