PAMOJA NA KUTIMKIA DENMARK, YANGA YAKOMALIA KESI YAKE NA OKWI

Uongozi wa Yanga umesema kuwa hauna presha na kuondoka kwa kiungo wa Simba, Emmanuel Okwi mwenye kesi nao huku ukisema kuwa hata angejichimbia wapi, atapatikana tu kusikiliza kesi yake.

Yanga ilimfungulia kesi Okwi katika Shirikisho la Soka la Kimataifa (Fifa) ikimdai kitita cha dola mil moja (Sh bilioni 2) kutokana na kuvunja mkataba kisha kujiunga na Simba kabla ya kupata shavu barani Ulaya kwa kujiunga na Sonderjyske ya Dernmark na kusaini mkataba wa miaka mitano mwishoni mwa wiki iliyopita.

Nyota huyo raia wa Uganda, alitua Jangwani msimu wa 2013/14 na kuingia kandarasi ya miaka miwili, lakini akaingia kwenye mvutano na klabu hiyo kwa kile kilichodaiwa hakulipwa fedha za usajili ambazo ni dola 40,000, lakini Yanga wakapinga na kumfungulia kesi Fifa.

Mwanasheria wa Yanga, Frank Chacha, ameliambia Championi Jumatatu kuwa, hawana presha na kuondoka kwake na hata angekwenda wapi lazima apatikane kusikiliza kesi yake.

“Suala la kuuzwa kwake sisi hatuna shida nalo. Cha msingi ni kwamba madai yetu yapo palepale na kesi ipo palepale huko Fifa. Hata angekwenda Marekani, Ufaransa hawezi kukwepa hilo. Kila kitu tulikamilisha na jalada la kesi limeishafunguliwa, hivyo tunachosubiri kwa sasa ni Fifa kutupa majibu na kutuambia ni lini kesi itasikilizwa,” alisema Chacha.