SIKU CHACHE MAZOEZINI, NGOMA ALIONYESHA UWEZO WA MAKALI HAYA

NGOMA...

STRAIKA mpya wa Yanga aliyetawala kwenye vinywa vya mashabiki kwa sasa, Mzimbabwe, Donald Ngoma leo anafikisha siku ya nne katika mazoezi ya timu hiyo lakini kikubwa kinachozidi kukuza jina lake ni makali anayoendelea kuyaonyesha kikosini hapo.

Ngoma ambaye ametua Yanga kwa mkataba wa miaka miwili akitokea FC Platinum ya Zimbabwe awali alifanya mazoezi na timu hiyo wiki iliyopita kwa siku mbili mfululizo kabla ya kuelekea kwao kukamilisha baadhi ya vitu na kurejea kazini juzi na jana akaanza rasmi mazoezi huku akizidi kuonyesha kuwa yeye ni bora.

Mchezaji huyo ‘aliyeenda hewani’ amekuwa akizidi kumshawishi Kocha wa timu hiyo, Mholanzi, Hans van der Pluijm kwa kubainisha kwamba ana vitu vingi anavyopaswa kuwa navyo straika wa uhakika huku jitihada zake zikionekana kuwazidi kiaina baadhi ya nyota wengine kikosini hapo wakiwemo Kpah Sherman na Hussein Javu.

Katika siku hizo tatu alizohudhuria mazoezi, mshambuliaji huyo amefanikiwa kuonyesha wazi vitu sita vya msingi ambavyo kama ataendelea kuwa navyo katika siku za usoni, basi ni ngumu kwa jina lake kufutika mapema kwenye ramani ya soka nchini na Yanga watafurahia matunda yake miaka yote atakayoitumikia timu hiyo, hakika unaweza kusema hakuna atakayekuwa bora kama yeye:

Anaweza kulinda mpira

Ngoma anajua kulitumia vema umbo lake na kuwatesa mabeki linapokuja suala la kuudhibiti na kuuficha mpira pale inapotokea.  Mara kadhaa anapopewa mipira kwenye msitu wa mabeki, kwake imekuwa si tatizo kwa kuwapa mwili na kusumbuana nao kwa nguvu huku akiendelea kuulinda mpira aliopewa usipotee huku akitafuta upenyo wa kuwatoka, kupiga shuti ama kutoa pasi.

Ni hatari kwenye vichwa

Katika upande wa kucheza krosi pia amekuwa na ubora wake katika hilo baada ya kufanikisha kuruka sambamba na mabeki na kuwazidi kwa kuwahi kuicheza mipira hiyo kwa ufanisi mkubwa, aidha kwa kuunganisha na kutoa pasi hatari kwa mwenzake au kuelekeza mwenyewe wavuni inapotokea kuna ulazima huo wa kufanya hivyo kwa kichwa.

 

NGOMA...

Mashuti anayopiga ni hatari

Ingawa kwa haraka haraka unaweza kumuona kama mtu wa kusubiri ‘ku-press’ sana langoni anapokutana na kipa lakini kwenye suala la kupiga ‘mashine’ pia amejaaliwa, hasa inapotokea amepata nafasi ya kupiga mashuti ya kushtukiza basi kwake inakuwa siyo ishu na kujaribu bahati yake.

Katika hili, faida nyingine ni kwamba si mshambuliaji wa kupiga ilimradi bali ‘tageti’ ya lango ndiyo shida yake kubwa, mara nyingi anaonekana kupima kwa kina mahala anapoupeleka mpira kwa shuti japokuwa kipimo hicho hukifanya kwa uharaka mkubwa kwa ajili ya kuwahadaa mabeki.

 

NGOMA AKIWA NA ZUTTAH BAADA YA KUWASILI NCHINI DAR ES SALAAM TAYARI KUJIUNGA NA YANAGA.

Siyo mchoyo/uamuzi wa haraka

Faida nyingine aliyonayo Ngoma ni katika uamuzi wa haraka anapokuwa na mpira bila ya kuvunga na kuharibu ‘timing’. Anapopokea mpira mara moja huwa naye anautoa na kisha anajipa nafasi ya kujipanga kuupokea tena na kusonga mbele kupitia soka la pasi. Hata inapotokea anahitajika kupiga pasi za mwisho kwa ajili ya kufunga bao pia hufanya hivyo kwa mshambuliaji mwenzake au mchezaji mwingine aliyetangulia eneo la hatari.

Ana spidi

Wachezaji wenye maumbo makubwa kama yake mara kadhaa hukumbwa na tatizo la kuwa wazito uwanjani na kukosa spidi, lakini kwake ni tofauti kwani amekuwa akionyesha kuwa ni mtu mwenye spidi na mwepesi sana kila akiwa na mpira.

Hali hii inaonyesha kuwa atakuwa msaada mkubwa kwa Yanga ili kuhakikisha timu hiyo inatwaa makombe kadhaa makubwa.

Hapa anasaidia pia katika suala la kukaba inapotokea mpira umepotea karibu na eneo lake kwani ni mwepesi wa kukimbia na kupigania tena ‘mali’.

Anaelewa haraka:

Maelekezo mengi yaliyokuwa yakitolewa na Pluijm kwa mastraika wake katika mazoezi hayo, yeye amekuwa akiyashika na kucheza kama vile inavyotakiwa, hapa anaungana kwa kiasi kikubwa na Amissi Tambwe kwa kuwa naye ana sifa hiyo anapokuwa mazoezini.

Ngoma amekuwa mwepesi katika kupokea maelekezo na amekuwa akifanya kile kinachotakiwa, hali ambayo inamrahisishia kazi yake katika suala la kuongeza mbinu za kuwahadaa mabeki.

SOURCE: CHAMPIONI