AZAM FC YAUNGANA NA SIMBA KUPINGA SH MILIONI NNE ZA MCHEZAJI WA KIGENI

Dalili za mvurugano kati ya Shirikisho la Soka Tanzania (TFF) na klabu za Ligi Kuu Bara zinaonekana kunukia ambapo klabu zimejitokeza kupinga utaratibu mpya wa shirikisho hilo kutaka klabu zilipe dola 2,000 (Sh milioni 4) kwa kila mchezaji wa kimataifa anayesajiliwa kwenye klabu.

Mkurugenzi wa Ufundi wa Azam FC, Saad Kawemba, amesema kuwa, klabu hiyo inapingana na utaratibu huo kwani ni wa kushtukiza na hawakushirikishwa.

“TFF katika hili hawajatutendea haki kwani hawajatushirikisha, hata hivyo tutaangalia jinsi gani ya kufanya ili haki yetu iweze kupatikana,” alisema.

Upande wa Simba kupitia rais wake, Evans Aveva, naye alipinga kwa kusema: “Hatukubaliani na uamuzi huo na hivi karibuni tutakutana ili kuangalia tunafanyeje.”

Yanga nao kupitia kwa katibu mkuu wa klabu hiyo, Dk Jonas Toboroha, wameupinga uamuzi huo wa TFF na kuungana na Simba na Azam FC ambazo ni klabu zenye wachezaji wengi zaidi wa kigeni kuliko nyingine.

Hivi karibuni Rais wa TFF, Jamal Malinzi alinukuliwa akisema bila ada hiyo hakuna mchezaji wa kigeni atakayeruhusiwa kucheza, hiyo ina maana kwa klabu yenye wachezaji saba itatakiwa kulipa dola 14,000 (zaidi ya Sh milioni 28).