LA LIGA SASA GUMZO RONALDO, AZAM TV YAENDELEZA UHONDO NA LIVE LA LIGA

MADRID, Hispania

KATIKA Ligi Kuu Hispania maarufu kama La Liga, Barcelona ndiyo timu pekee inayoonekana kuwa na rekodi ya asilimia 100 kwa msimu huu.

Barcelona ndiyo mabingwa watetezi wa La Liga, wana rekodi asilimia 100 baada ya kushinda mechi zao zote tatu za kwanza za ligi.

Mabosi wengine wa ligi hiyo, Real Madrid wana rekodi ya asilimia 85 kwa kuwa mechi moja walitoka sare. Sasa wanashika nafasi ya pili nyuma ya Barcelona iliyokusanya pointi 9 katika mechi hizo tatu.

Madrid ndiyo inaanza kushuka dimbani leo, ikiwa nyumbani itakipiga dhidi ya Granada, timu ambayo kwa rekodi inaonekana huwa haiwasumbui, wakikutana nayo katika mechi za mwanzoni.

Granada wamekuwa ‘wabaya’ kila wanapokutana na Real Madrid katika mechi za mwishoni mwa ligi, kwani wamekuwa wanachelewesha au hata kuwakosesha kutwaa ubingwa.

Barcelona wakiwa na uhakika wa hiyo asilimia 100 ya ushindi katika mechi zao tatu, nao watashuka dimbani kesho dhidi ya Levante ambayo katika msimamo wa ligi iko katika nafasi ya 15.

Mechi iliyopita kwa Barcelona ilikuwa ngumu, lakini wakaitandika Atletico Madrid kwa mabao 2-1, Lionel Messi alifunga na kufikisha mabao 286 ya La Liga. Sasa wanaweza kuwa na nafasi nzuri ya kuendeleza rekodi nzuri ya ushindi ya mechi yake ya nne.

Kingine kinachovutia katika ushindani wa timu hizo mbili ni namna watumishi wao tegemeo walivyo. Messi kwa upande wa Barcelona akiwa na Neymar na Luis Suarez wanaonekana wako vizuri tu.

Cristiano Ronaldo anaonekana kuwa gumzo zaidi kwa kipindi hiki na anatupiwa macho na wengi. Ndani ya mechi mbili amefunga mabao manane.

Mechi moja ya La Liga dhidi ya Espanyol na nyingine ya Ligi ya Mabingwa Ulaya dhidi ya Shaktar. Hiyo imeamsha morali ya Madrid chini ya kocha mpya Rafa Benitez.

Hauwezi kukwepa ushindani wa Ronaldo na Messi kwa kuwa umekuwa ukizidi kuleta raha ndani ya La Liga lakini hadi nje unapozungumzia Bara la Ulaya au Tuzo ya Mchezaji Bora wa Dunia.

Wawili hao, kila mmoja ana aina yake ya uchezaji lakini kila mmoja ana mafanikio na mashabiki wake ambao wanaridhika na utendaji wake.

Ronaldo ataendelea kutupia lundo la mabao kama alivyofanya katika mechi mbili zilizopita? Messi naye atasimama na kujibu mashambulizi? Ni suala la kutulia katika runinga yako na kuangalia kwa raha.

Watanzania kwa kipindi hiki wamekuwa na bahati zaidi kwani Azam TV watakuwa wakionyesha mechi za La Liga moja kwa moja.

Kuonyeshwa kwa mechi hizo, tena kwa kiwango cha malipo nafuu ya ving’amuzi, kunawapa nafasi Watanzania hao kujua vizuri ubora wa La Liga.

Kitakwimu, La Liga ndiyo ligi kubwa zaidi duniani. Hivyo ni nafasi nyingine kwa wapenda soka nchini kupima kuhusiana na hizo takwimu na ubora wa La Liga badala ya kuhadithiwa kama ilivyokuwa awali.

LEO JUMAMOSI:

Real Madrid        Vs Granada        

Valencia               Vs Real Betis      

Eibar                    Vs  Atletico Madrid     

Real Sociedad     Vs Espanyol        

KESHO JUMAPILI:

Sevilla        Vs Celta Vigo      

Deportivo Vs Sporting Gijon

Villarreal    Vs  Athletic Bilbao

Barcelona Vs Levante 

Las Palmas Vs  Rayo Vallecano