NGOMA, JUUKO KUKUMBANA NA RUNGU LA ADHABU YA UTUKUTU

NGOMA (KATIKATI) AKIPAMBANA NA SHOMARI KAPOMBE NA AGGREY MORRIS

Mshambuliaji nyota wa Yanga, Donald Ngoma na Juuko Murshid wa Simba watajadiliwa na Kamati ya Nidhamu ya Shirikisho la Soka Tanzania (TFF) baada ya kutuhumiwa kufanya makosa kwenye mechi za Ligi Kuu Bara.

Ngoma alimpiga kichwa kwa makusudi beki wa Simba, Kessy Ramadhan, Yanga ilipokutana na Simba, Septemba 26, mwaka huu wakati Juuko alimkanyaga kwa makusudi kiungo wa Mbeya City, Joseph Mahundi, Oktoba 17, mwaka huu.

Simba na Mbeya City zimeshawasilisha malalamiko yao muda mrefu hivyo kilichobaki ni kamati hiyo kuketi na kutoa ufafanuzi.

JUUKO

Mtendaji Mkuu wa Bodi ya Ligi Tanzania (TPLB), Boniface Wambura amesema makosa yaliyofanywa na wachezaji hao ni ya kinidhamu hivyo yatajadiliwa na Kamati ya Nidhamu ya TFF.

Alisema kuwa makosa hayo ni makubwa na hayawezi kuamuliwa na Kamati ya Uangalizi ya Matukio ya Ligi ya saa 72, hivyo yataamuliwa kwenye kamati ya nidhamu.

“Makosa waliyofanya wachezaji hayo ni ya kinidhamu yapo kwenye Kamati ya Nidhamu ya TFF, wao watatoa uamuzi,” alisema Wambura.

Kumekuwepo na malalamiko ya muda mrefu kuhusu Ngoma kutojadiliwa na kamati hiyo kwani malalamiko dhidi yake yaliwasilishwa TFF muda mrefu.