YALE YAKE, WANAJESHI WAFANYA VURUGU, WAMDUNDA MWAMUZI, WAKAMATA KAMERA ZA WAANDISHI, SIMU ZA MASHABIKI

HII ILITOKEA MSIMU ULIOPITA BAADA YA WACHEZAJI WA POLISI TABORA KUWASHAMBULIA WAAMUZI KWA KUWAPIGA VIBAYA. SAFARI HII WACHEZAJI WA RHINO YA TABORA NA UMEKUWA MWENDELEZO WA TIMU ZA MAJESHI KUFANYA HIVYO NA INAONEKANA VIONGOZI WA JUU WAMESHINDWA KUWATHIBITI VIJANA WAO KUFANYA TABIA HIZO ZA UTOVU WA NIDHAMU.

Katika hali isiyokuwa ya kawaida, Mwamuzi Msaidizi katika mchezo wa Mbao dhidi ya Rhino Rangers, Jilili Abdalah kutoka Singida, alijikuta akipokea kichapo kutoka kwa wachezaji wa timu ya Rhino Rangers baada ya timu ya Mbao kufunga bao la pili katika mchezo huo wa Ligi Daraja la Kwanza uliomalizika kwa Mbao kuifunga Rhino kwa bao 2-0.

Rhino Rangers inamilikiwa na Jeshi la Kujenga Taifa (JKT).

Mchezo huo uliochezwa kwenye Uwanja wa CCM Kirumba, ulikuwa na vurugu za hapa na pale. Wachezaji wa Rhino walianzisha vurugu baada ya mwamuzi wa kati, Linus Joseph kutoka Arusha kutoa faulo iliyopigwa kuelekea lango la timu hiyo na kuzaa bao ambalo lilifungwa na Ndanki Robers dakika ya 90.

Championi lilishuhudia mchezaji wa Rhino Rangers, James Mwambembe, akipewa kadi nyekundu baada ya kumpiga mwamuzi msaidizi ambapo baada ya mchezaji huyo kupewa kadi hiyo, vurugu zikaanza na kusababisha mchezo huo kusimama kwa muda kabla ya kuendelea kwa dakika 2 na kisha mchezo huo kumalizika.

Mara baada ya mchezo huo kumalizika, wachezaji wa Rhino Rangers walimvamia mwamuzi wa kati Linus Joseph na kuanza kumshushia kichapo kabla ya kuokolewa na baadhi ya wanajeshi waliokuwepo uwanjani hapo.

Nao baadhi ya wadau wa soka waliokuwepo katika uwanja huo, wamelaani vikali kitendo hicho ambacho kwa hakika siyo cha kimichezo.

“Sisi tumehuzunishwa sana na kitendo cha wanajeshi ambao wanajiita wachezaji wa Rhino kumpiga mwamuzi, ni wazi kwamba TFF watapata taarifa ili waweze kutokomeza vitendo hivi ambavyo havikubaliki katika soka,” alisema shabiki mmoja.

Ikumbukwe kuwa, hii siyo mara ya kwanza kwa timu ya Rhino Rangers kufanya vurugu katika michezo ya Ligi Daraja la Kwanza kwani hata msimu uliopita, wachezaji wa timu ya Toto African walijikuta wakichezea kichapo kwenye Uwanja wa Ali Hassan Mwinyi mkoani Tabora na kusababisha baadhi yao kulazwa hospitali.

Katika tukio jingine, viongozi wa Rhino ambao wanasadikika kuwa ni wanajeshi, walimnyang’anya kamera mpiga picha wa Clouds Media Group, Hamza Mkuza na kumuamuru afute kila kitu alichokuwa akirekodi kwenye mchezo huo.

“Kwanza walinifuata wakanipiga kichwa huku wakinikaba na kuanza kunilazimisha kuwa nifute kila kitu, vinginevyo kamera itavunjwa na mimi baada ya kusikia hivyo, ikabidi nitii amri kwa kuwa sikuwa na la kufanya,” alisema Hamza.