THOMAS ULIMWENGU NA GARI KAMA LA WAYNE ROONEY, JOHN TERRY...

Na Saleh Ally

NIANZE kwa kukumbusha baadhi ya Watanzania kuhusu wanasoka wanaotembelea moja ya magari ghali ya Range Rover katika soka.

Nawajua John Terry wa Chelsea, Wayne Rooney wa Manchester United, Kolo Toure wa Liverpool, Gareth Bale wa Real Madrid na wengine kadhaa. Yanaweza kupishana thamani, lakini ndiyo Range Rover.

Labda hapa nyumbani acha nikukumbushe wafanyabiashara maarufu wanaotumia gari la aina hiyo la Range Rover; Mwenyekiti wa Yanga na milionea, Yusuf Manji, milionea mwingine Simba damu, Mohammed Dewji, milionea Tanil Somaiya na wafanyabiashara wengine wachache walionazo.

 Lakini nataka nikuambie kitu ambacho huenda ulikuwa haukijui au ulikijua lakini ukawa umekisahau kwamba wanasoka pekee wanaotembelea magari hayo ghali ni Mbwana Samatta na Thomas Ulimwengu wanaokipiga TP Mazembe ya DR Congo.

 Wawili hawa, huenda ndiyo Watanzania wenye umri mdogo zaidi kuwahi kumiliki gari ya aina hiyo ambayo thamani yake ni kuanzia Sh milioni 80 kwenda juu.

 Jamani, hata Ulimwengu anamiliki gari aina ya Range Rover ambalo huenda wafanyabiashara kibao maarufu inakuwa vigumu kuingia kwenye bajeti ya kulinunua. Kwani uendeshaji wake, (si ule wa kukaa kwenye kiti) ni ghali sana, mfano matengenezo au ununuzi wa vipuri.

 Kilichosababisha kuandika makala haya, nilikuwa nikiperuzi mambo kadhaa mtandaoni, nikaona picha ya Ulimwengu akiwa nyuma ya usukani ulioandikwa Range Rover. Alikuwa ameweka maelezo kwamba anatokea Morogoro kwenda Dodoma kumsamilia na ‘kudeka’ kidogo kwa mama yake.

 Niliganda kwenye picha hiyo na kufikiri mambo mengi sana, mwisho nikatabasamu. Pia nikakumbuka mengi ambayo nimeona litakuwa ni jambo jema ‘kushea’ nanyi kuhusiana na hili.

Miaka minne na ushee iliyopita, Ulimwengu alikuwa akifika ofisini kwangu Global Publishers pale Bamaga na kunisubiri nje nikiwa naendelea na shughuli zangu. Baada ya hapo nilitoka na kuongozana naye kwenda kwenye ubalozi wa Sweden ambako nilikuwa nikimsimamia kupata visa baada ya klabu AFC ya huko kumhitaji.

GARI KAMA ANALOMILIKI ULIMWENGU.

 Rafiki zangu wawili walishughulikia safari yake, mmoja akiwa hapa Tanzania na mwingine Sweden. Hivyo niliwasaidia wao, lakini Ulimwengu ambaye hakika hakuwai kuchelewa hata siku moja kwa kuwa alionyesha kweli alipania kwenda Sweden.

 Alikwenda, baadaye akarejea na mwisho tukaanza tena utaratibu huo wa kushughulikia visa. Wakati akija ofisini kwangu, alikuwa akitumia daladala, hakuwa hata na baiskeli nafikiri kwa kuwa sikuwahi kuiona.

 Usisahau, Ulimwengu alikuwa akitegemea usafiri wangu kwenda ubalozini na sehemu nyingine tulizokuwa tukihitaji kufika.

 Miaka minne na ushee, Ulimwengu anamiliki Range Rover, gari ambalo lina thamani mara kumi au zaidi ya lile langu alilokuwa akilipanda. Tena anamiliki na mengine zaidi ya hilo.

 Hapo ndipo nilipoanzia kuwaza mambo mengi sana, hapa lengo si kukuelezea urafiki wangu na Ulimwengu lakini ni kukuonyesha mambo yanavyoweza kuwezekana hata kwa vijana wetu wa Kitanzania na pia ndani ya Afrika.

Kuwezekana:

Kuna watu wengi wanaamini mafanikio ni lazima mtu ahitimu elimu tena kwa kiwango cha digrii, nafikiri ni fikra finyu kabisa. Nchi nzima hawawezi kwenda shule na wote kuhitimu kwa kiwango cha juu. Hata Lionel Messi na Ronaldo hawana digrii na wamefanikiwa.

Kikubwa ni watu kuangalia katika ndoto zao na mwisho kuhakikisha wanafanikiwa kuzifia tena kwa nidhamu kuu.

Maisha ya Ulimwengu wa miaka minne tu iliyopita si huyu wa sasa na lazima tukubali kwamba amefanya juhudi kubwa. Kwani hata maisha yake alikuwa akilala kwenye hosteli za TFF na mazingira si bora, lakini alijua anatafuta nini.

Vijana wengi wa Kitanzania hawataki kujaribu, hawako tayari kuingia kwenye mateso au shida na wanataka mambo yaende kwa ulaini utafikiri filamu., ndiyo maana wanakwama. Ulimwengu awe shule kwenu.

Afrika:

Bado vijana wengi wanasoka wanaamini mafanikio hadi Ulaya ambalo ni jambo potofu kabisa. Ulimwengu anaendesha gari kama la Rooney au Terry na anacheza soka barani Afrika.

Leo yuko Japan na TP Mazembe kucheza Kombe la Dunia la klabu, Cristiano Ronaldo hana nafasi hiyo wala Raheem Sterling hajawahi kucheza katika michuano hiyo.

Hii inaonyesha hata Afrika kunaweza kuwa na mafanikio makubwa kulingana na mtu au watu wanavyoamini au walivyojipanga.

Wakati mwingine vema kuanza kutafuta mafanikio nyumbani, nje ya nyumbani kuanzia karibu au jirani na sasa nafasi ya Ulimwengu kwenda Ulaya ni laini zaidi.

Kumbuka, Ulimwengu alitoka Sweden kwenda TP Mazembe, huenda alionekana hana lolote. Usisahau Ulimwengu alifeli majaribio Hamburg ya Ujerumani wakati huo staa pale akiwa Ruud van Nisterlooy. Lakini Ulaya kwake si kitu kigumu tena, anacheza Kombe la Dunia. Niseme najivunia alipofikia Ulimwengu kama Mtanzania, bado ninaamini kuna wengi sana wanaweza kufikia hapo na zaidi na nikajivunia pia. Ewe mchezaji kinda, soma haya makala, tumia muda wako kutakari, uamuzi wa maisha yako ni wako. Kila la kheri.