TAMBWE ANAAMINI TAPIGA MABAO ZAIDI NA KUMPIKU KIIZA WA SIMBA

Straika nyota wa Yanga Mrundi, Amissi Tambwe ametaja sababu za kumzuia Mganda, Hamis Kiiza kwenye ufungaji bora msimu huu wa Ligi Kuu Bara.
Kauli hiyo, aliitoa mara baada ya kufunga bao lake la 15 kwenye msimu huu wa ligi dhidi ya Simba huku akimkaribia Kiiza mwenye mabao 16.

Washambuliaji hao, hivi sasa wapo kwenye vita kubwa ya kuwania ufungaji bora baada ya hivi karibuni Tambwe kupitwa na Kiiza kwenye idadi ya mabao.

Tambwe alisema moja ya sababu zinazompa jeuri ni kiporo cha mechi yao walichokibakiza dhidi ya Mtibwa Sugar.

Tambwe alisema, kwenye kiporo hicho kilichobaki atahakikisha anapambana ndani ya uwanja kwa kuhakikisha anatoka na bao litakalomkaribia mpinzani wake huyo.

“Mimi ndiye mwenye nafasi kubwa ya kutwaa ufungaji bora, ninatamba hivyo kutokana na Yanga  kubakisha kiporo kimoja cha mechi ya ligi kuu dhidi ya Mtibwa.

“Simba wenyewe wamecheza michezo 19 sambamba na Azam FC, Simba wao wamecheza mechi 20, hivyo utaona ni jinsi gani nilivyokuwa na nafasi ya kumtoa juu.

“Mimi nitakachokifanya ni kutofanya masihala kwenye mechi hiyo ya kiporo kwa kuhakikisha ninatumia vyema kila nafasi nitakayoipata ndani ya uwanja kwenye mechi hiyo,”alisema Tambwe.