BAADA YA USHINDI WA LULU, ALI KIBA SASA ATAKA SERIKALI KUWASHIKILIA WASANII

Mwanamuziki Ali Saleh Kiba amesema ingekuwa ni jambo zuri kama wasanii wa Bongo Movie watapewa nguvu zaidi na serikali.

Kiba ameyasema hayo wakati akizungumzia ushindi wa Watanzania Single Mtambalike ‘Rich’ na Elizabeth Michael ‘Lulu’ wakati wa tuzo za African Magic People’s Choice zilizofanyika katika hoteli ya Eko katika kisiwa cha Victoria jijini Lagos, Nigeria, usiku wa kuamkia jana.

Akizungumza mjini hapa, Kiba alisema kuna mengi yanawezekana lakini lazima kuwe na nguvu ya serikali kama sehemu ya kuunga mkono.

“Wasanii wa Bongo Movie kama ilivyo sisi wa Bongo Fleva tunatamani kufikia sehemu Fulani. Hongera kwa Rich na Lulu, sasa serikali iingie na kusaidia.

“Hawa walioshinda leo ni mfano na serikali inaweza kuingia na kusaidia zaidi kwa kuwa wameonyesha inawezekana kufanya vizuri nje ya Tanzania,” alisema.

Kiba ambaye alitumbuiza katika tamasha hilo aliungana na Rich Rich na Lulu kusherekea wao kufanikiwa kutwaa tuzo hizo kubwa zaidi katika filamu barani Afrika.