BAADA YA USHINDI WA LULU TUZO ZA AMCA, VAN VICKER ANAAMINI TANZANIA ITAENDELEA KUPASUA LAKINI....

Muigizaji nyota wa Ghana, Joseph van Vicker amesema Tanzania ina nafasi kubwa ya kuendelea kutamba baada ya wasanii wake wawili kushinda tuzo.

Single Mtambalike ‘Rich Rich’ na Elizabeth Michael ‘Lulu’ wameibuka washindi katika tuzo za African Magic Peoples Choice Awards zilizofanyika kwenye Ukumbi wa Hoteli ya Eko kwenye kisiwa cha Victoria jijini hapa.

Akizungumza na SALEHJEMBE jijini Lagos, Nigeria, van Vicker alisema Tanzania kuna vipaji ambavyo vinaweza kuendelea kutamba.

“Tanzania inajulikana kuwa ni moja ya nchi za Afrika zinazoweza kufanya vizuri na leo ni mfano mzuri.

“Wamechukua tuzo mbili ambalo ni jambo zuri kwa mwanga wa tasnia ya filamu. Kikubwa watu wawe pamoja na kushirikiana kufikia malengo.

“Kweli mbali si kitu rahisi, lazima kushirikiana, kukosoana na kupeana nguvu,” alisema.

Wasanii mbalimbali walikuwa wakiwapongeza Rich na Lulu kutokana na ushindi huo unaoonekana ni sehemu ya mafanikio upya ya Tanzania.